Seleccion di Aruba Girls U15 ta empata den nan debut internacional

ORANJESTAD (AAN) -- E seleccion di Aruba Girls U15 a hunga un bon wega, diabierna anochi, contra di e seleccion di Corsow U17.

Den un stadion Guillermo Trinidad yena di fanatico, Aruba su seleccion femenino hubenil ta bini bek den e di dos tempo y empata e partido.

            Den e prome tempo Aruba a hunga un bon futbol di toke pero tabata falta e acabado y mas tiro riba gol. Na banda drechi, cu Wendy Angela y Loredana Nepi, Aruba a crea algun bon chens den e prome tempo. Padilanti e hungador di Hulanda, Jill Dreischor, a forza bon; kizas tabata falta poco mas tiro riba gol. Mester bisa cu e defensa di Aruba tabata solido guia pa Michaela Netto. Pa loke ta Corsow, sin duda un bon seleccion fuerte den curpa unda a gana varios duelo individual y sigur nan rapidez tambe a resalta.   

            Na di 39 minuut, Corsow ta anota gol pa medio di un penalty cu a wordo bon cobra pa e capitan Raengelly Keller. Den e di dos tempo, Aruba ta sali brabo y ya na di 51 minuut e alero Sundari van der Linden ta haye den e area penal y cu su pia robez e ta los un bon tiro cu ta pega den net pa e 1 - 1.  Mester bisa cu tanto Aruba como Corsow a hasi varios cambio y aki e ritmo di wega a cambia por completo.            

            Aruba tabata un bes mas mihor den e toke tanto den defensa y volante pero una bez padilanti tabata falta e creatividad pa anota e gol. Mucho mas no a pasa den e partido cu e keda empata 1 - 1. Nos kier a manda palabra di pronto recuperacion pa e hungador di Corsow, Rusha Petronilia cu a sali lesiona y mester a bay hospital pa observacion.

            Na final e presidente, Sr. Randolf Lacle y e directiva AVB a duna un bunita recuerdo na e seleccion di Corsow pa cu e wega amistoso contra di Aruba. Tambe ambos seleccion a haya un goody bag di e producto Always for di representante di Compra NV, sra. Ana Maria Ramirez.