Seleccion di Aruba Girls U15 a debuta y gana prome wega 5-0

ORANJESTAD (AAN) -- Seleccion di Aruba Girls U15 ta gana nan prome wega 5 - 0 contra di St. Vincent & Grenadines den e U15 CONCACAF Girls Championship.

            E seleccion di Aruba Girls U15 a debuta na Aruba cu un victoria amplio den e torneo CONCACAF Girls U15 dialuna anochi den stadion di Guillermo Trinidad na Dakota.

            Un Aruba simplemente dominante cu un Zyana Rogers grandi padilanti, nos damitanan a hunga den forma y logra nan prome victoria.

            Aruba a toca e bala bon y sigur a crea hopi peliger dilanti gol di e ekipo contrario cu Rogers, usando su velocidad bon unda e la haya varios oportunidad di gol, aunke mester duna credito na e keeper di St. Vincent & Grenadines cu a para hopi bala. Un penalty cobra pa Breinburg cu a bini di Hulanda a habri e marcador 1 - 0 pa Aruba. Despues di e gol, Aruba ta lansa un ofensiva formal unda Rogers ta anota dos gol tras di otro pa e 3 - 0. Na su di dos gol, Rogers ta hala e keeper magistral y anota cu gol bashi.

            Den e di dos tempo, Aruba a sigui presiona bon unda e hungador Leandra Angela ta anota gol number 4 pa Aruba. Mester bisa si cu e wega, na dado momento, a bira hopi fisico unda nos muchanan a wordo duro basha abou. Referee tabata mucho tolerante y esaki a causa hasta cu Breinburg mester a bandona wega.

            Den e den extra minuutnan di e di dos tempo, Zyana Rogers ta anota su di tres gol a la Marco van Basten contra di Alemania na aña 1988, unda e ta slice y pusha e bala den gol cu ta pasa bou di e keeper su braza. Esaki tabata Zyana su di tres tanto pa e 5 - 0 final.