ORANJESTAD(AAN): Despues di 3 aña porfin High Winds tabata bek na beachnan di Aruba y organizadornan ta hopi contento con e evento e bay e aña aki.
Tabata tin un cantidad grandi di participante den entre otro Windsurfing, Big Air y Kite Surfing, incluyendo atletanan renombra mundialmente manera Arubiano Sarah-Quita Offringa , kende 19 biaha a bira campeon mundial di Windsurfing.
Mirando con e evento a bay y e interes grandi di publico, organizadornan a nota cuanto falta High Winds a haci durante e tempo cu e no por a wordo organiza.
E organizadornan a priminti cu otro aña e evento aki ta bay ta ainda mas grandi.
Durante un entrevista Sarah-Quita Offringa a papia di su participacion.
El a indica cu ora cu el a tende cu despues di 3 aña lo organiza High Winds un biaha mas el a dicidi di participa.
Mayoria biaha e no por a participa na High Winds, debi na e hecho cu semper den mesun luna e tabata tin competencianan internacional pa participa na dje.
E aña aki si e tabata por.
“Mi a bisa si mesora, pasobra pa competi na cas semper ta un dushi feeling”.
High Winds ta e prome competencia na cual mi a participa, despues cu mi a wak mi ruman competi den e evento, segun Offringa.
El a sigui bisa cu e atmosfera dushi cu tin ta locual a atrae na windsurfing.
Segun e campeon mundial e bunita di High Winds ta cu banda di e competencianan normal cu semper tabata tin, recientemente a bin acerca diferente competencia nobo incluyendo tambe Mountain Bike.
El a splica cu e aña aki ta prome biaha cu e mes a participa na kite surfing.
Entregamento di premio a tuma lugar na Paseo Herencia Dialuna.
https://diario.aw/categories/noticia/deporte/sara-quita-offringa-contento-cu-e-por-a-participa-e-ana-aki-na-high-winds#sigProId0dfecaf510
