Sambombaso encuentro di domino Diasabra awor

ORANJESTAD (AAN) -  Diasabra awor, 11 di maart, cuminsando pa 8’or di anochi, un tabla lo bay bula halto aya n’e conocido y mundialmente famoso Domino Square Garden net n’e grens entre Kudawecha y Calabas.

E ‘yuchi’ di Team Snor, esta Pariba Legends DT, biaha pasa a haya ‘een standje’ cerca e trabuconan di Biba Lekker DT, bou guia di captain Trimon. Despues di a haya ‘op hun donder’ di ‘El Padrino’ himself, nada menos cu ‘Snor’ Perez, e a dicidi cu ta e y su team mes lo tin cu bay saca e sla aki afo pa su alumnonan di Pariba Legends. Captain Trimon ta djis hala schouder y cu hari den cachete ta bisa “un pa un, tur ta haya”!

Dus shonnan amante di domino estilo candela, prepara boso mes pa un sambombaso di encuentro ora cu e unico matematico den domino, Nelson ‘Snor’ Perez, baha cu su gang pa trek e cos aki recht contra Biba Lekker! Den ultimo tempo ta parce cu Team Biba Lekker a cuminsa crece bira un monster inparabel cu ta guli un team tras di otro manda abou.

Di otro banda, e mente incansabel di Snor tampoco no ta para y un y tur ta ansioso pa wak cu ki ‘strategia nobo’ Snor lo bin e biaha aki.

E bataya aki lo cuminsa 8’or di anochi, y manera ta di custumber na Domino Square Garden, entrada pa publico en general ta completament. Yega y bin disfruta di otro anochi ‘high tension’ n’e unico Domino Square Garden na mundo!