Royal Power Tat Fat defendiendo su titulo ta topa e Fuerte ekipo di Calabas Blue Jays den half final

Copa Noord 2026 drentando su recta final

ORANJESTAD (AAN): Copa Noord 2026 organiza e aña aki pa Calabas Blue Jays dedica na (5) Baluarte Lea Tromp, Maria Boekhoudt, Aldrin Boekhoudt, Julieta (Jeta) de Cuba Lenin Ashby ta drenta su recta final e weekend binidero pa asina determina kende lo bira Campeon di Copa Noord 2026.

   Por corda con Royal Power Tat Fat a titula Campeon di Copa Noord 2025 derotando Salbabo den e gran final. E aña aki Royal Power Tat Fat tin e tarea pa trata na defende su titulo. Diabierna 3 di Juli Royal Power Tat Fat lo enfrenta e fuerte ekipo di Calabas Blue Jays, organizadornan di Copa Noord 2026. E wega aki lo tuma luga riba veld di Centro di Bario Noord den un cruze di un pa tera y un pa lama. Pues e ganador lo continua pa hunga e gran final diadomingo atardi 2:00 pm mientras e perdedor lo yama ayo te otro aña.

   Diasabra anochi  tin un otro cruze interesante momento Kudawecha Redskins enfrenta e fuerte ekipo di Yoyo’s Power kendenan a debuta e aña aki pa prome biaha den Copa Noord y ta invicto te cu awor. Ganador di e wega aki tambe lo pasa pa e gran final. Pues diabierna e teamnan Royal Power Tat Fat vs Calabas Blue Jays y diasabra Kudawecha Redskins vs Yoyo’s Power lo ta eliminando otro pa e ganadornan topa otro diadomingo atardi 2 pm den e gran final.

   Alavez lo bay tin finalnan di Damas y liga comercial.

   Fanaticada di softball reserva Diabierna y diasabra pa e weganan riba veld di Centro di Bario Noord mientras e finalnan diadomingo lo wordo hunga riba veld di Calabas Bluie Jays. Exito na tur ekipo.