ORANJESTAD (AAN): Diahuebs ultimo dia 8 di juli 2021 Caribbean Football Union a tene su congreso na JW Marriot na Miami.
Ta despues di 22 luna cu e miembronan a topa atrobe personalmente.
Durante e congreso aki e miembronan di CFU a eligi un Executive Committee (bestuur) nobo pa e proximo 4 añanan y na mes momento e reeligi ing. Richard Dijkhoff, presidente di Arubaanse Voetbal Bond, como miembro ehecutivo. El a haya e puesto di vice-presidente di CFU.
Esaki ta un logro grandi. Mester mir’e cu banda cu Aruba tin un representante den e Executive Board di CFU, pa dirigi, administra y maneha futbol pa 31 isla den Caribe, cu e Arubiano aki ta reeligi pa traha na bienestar di henter Caribe.
Tur esaki a base di e bon trabou cu el a bin ta deplega den Caribe, aportando grandemente na e desaroyonan positivo cu ta tumando luga den Caribe pero tambe pa e reconocimiento cu su persona ta ricibi pa e desaroyonan positivo cu CFU ta experenciando den AVB y pa futbol na Aruba.
A reeligi e presidente di AVB, ing. Richard Dijkhoff, entre otro pa e elogionan y reconocimentonan cu e federacionnan a dune’ pa e cambionan cu e ta introduciendo riba diferente area den maneha, dirigi y administra futbol na Aruba, pero principalmente pa locual ta trata e 8 areanan cu AVB a identifica pa desaroya pa asina eleva e nivel di futbol den su totalidad na Aruba.
E plan aki cu a haya e nomber di "Grow Football Aruba" y ta consisti di
- Club Development
- Coach Development
- Talent Development
- Women’s Football Development
- Referee Development
- National Teams Development
- League Development
- Facilities Development
CONCACAF a adopta e plan integral aki cu e meta pa despues cu AVB caba di implement’e exitosamente, bou guia di mentor di CONCACAF, Etienne Siliee, lo implementa e plan aki den e 40 otro federacionnan den CONCACAF. Pues desaroyonan super positivo pa Aruba y e demas islanan den Caribe.
E experiencia cu ing. Richard Dijkhoff a gana e ultimo añanan den AVB na Aruba, pero tambe trahando di cerca cu CONCACAF, FIFA y KNVB, a hacie un berdadero ehecutivo bon prepara den futbol pa henter Caribe. E organisacion Caribense como tal a mira e desaroyonan aki cu a sosode bou su liderasgo y mesora a puntr’e pa compartie cu e demas islanan den Caribe.
Dijkhoff ta convenci cu futbol ta uni pueblonan y na final ta crea lidernan den nos comunidadnan. No mester mira futbol solamente como un deporte, sino henter e movimiento rond di dje ta hacie mas cu djis skop bala.
Ing. Richard Dijkhoff lo sigui traha na bienestar di futbol tanto internacional- y localmente tanten cu permitie pa sigui dirigi y crece futbol na Aruba. Un pabien grandi ta bay pa ing. Richard Dijkhoff, presidente di AVB pa e logro aki y pa un biaha mas pone nomber di Aruba resona internacionalmente.
