Replica y Secreto a bira e gran campeonnan di Gran Clasico Internacional

ORANJESTAD (AAN): E fin di siman tras di lomba a tuma lugar e “Gran Clasico Internacional” di cabay na Villa Floralina.

Un total di 18 cabay a bin di Corsow pa competi ferozmente contra cabainan di Aruba. Un publico grandi y anima a goza di e bataya entre e cabaynan, cu a ser huzga pa e juez veterano di Bogota, Mauricio Camacho. E feria a duna un fuerte indicacion cu e deporte di cabay a drenta un era nobo, cu hopi animo y hopi expectativa.

            Den e categoria di macho paso fino tabatin un fuerte disputa pa e titulo di Gran Campeon y finalmente “Secreto de Magico” di famia Michael de Cuba a gana di “Sueño Dorado” di Ricky Winkel di Corsow den e final emocionante, bou grito y aplauso di e fanaticonan di Aruba.

Den yegua tambe e final a bira un di hopi emocion. ‘Replica de la Trocha” pa gran alegria di su doño Giyo Martina di Corsow a bira e Gran Campeona, ganando “Azucarada de San Isidro” di Criadero Alma.      Di e forma aki e 2 premionan maximo a keda bunita reparti entre e islanan.

Den e modalidad di trocha “Heredero del Rey” di Villa Floralina a bira e Gran Campeon y e mesun criadero tambe a gana e competencia di trote & galope cu nan ehemplar “Conquistador de Villa Floralina”. Bunita pa mira cu crianan local ta alcansando un nivel asina halto.

            Den cabaynan hoben di paso fino tabata un placer pa mira con “El Junior” di Floralina a bira e campeon den potro, mientras cu “Picamimosa” di Jowey Velasquez di Corsow a recibi e mesun corona, pero den potranca. E mihor potro fino den proceso cu a debuta den e feria aki a bira un yiu di “Secreto”,  “Zafiro Azul” di Rancho Monte Azul.

            E mihor Capon di e feria tabata “Polvo Robado” di famia Magdalena di Corsow. Den competencia di cabaynan di paseo, “Chiquinquira de la Mecanica” di Fernando Lewis a bai cu e gran titulo den paso fino, mientras cu e mihor yewa di trocha paseo a bira “Bienvenida” di Famia Mouawad.

            Durante e feria directiva di Organizacion Caballista Arubano (OCA) a honra dos baluarte di Corsow. Earnie Schoop tabatin un rol indespensabel den e realisacion exitoso di e Gran Clasico, dedicando hopi hora pa tur cos a cana nechi regla pa e cabaynan di Corsow por a hasi e viaha, danki na un donacion grandi y espontaneo di e compania “Don Andres”. E segundo distincion di “Embahador di Bon Boluntad” a bay pa Stanley Ignacio, kende pa masha hopi aña a percura pa tin un bon relacion entre e dos islanan. Stanley ta co-fundador di e federacion mundial “Confepaso”. Semper Stanley tey pa busca solucion ora cu cos pega.

            E anochi di Diasabra a sera cu un baile masha anima cu musica di e banda “Vallenato Plus”. Proximamente Aruba lo reciproca e bishita di Corsow y competi na nos hermana isla pa e deporte sigui crece.