Reconocemento na Baluarte di Deporte Carlos 'Calulu' Comenencia

ORANJESTAD (AAN):  Diabierna atardi Minister Endy Croes a haci un bishita di cortesia na cas di sr. Carlos 'Calulu' Comenencia pa sorprende cu e reconocemento di ‘Baluarte di Deporte’.

            Na comienso di luna di october Calulu a wordo selecta den e ekipo di e 11 miho futbolista entre 100 futbolistanan di Curaçao pa Federacion di Futbol di Curaçao en conexion cu nan 100 aña di existencia.

            Calulu a cuminsa hunga futbol cu e edad di 7 aña cu ekipo di Puppilen di Estudiantes na Mundo Nobo. Despues Calulu a hunga pa Sithoc, cual ekipo tabata e unico cu Calulu a hunga na Curaçao. Despues di a cosecha exitonan grandi cu Sithoc como medio campista, na edad di 23 aña Calulu a bin Aruba y ta formando parti di SV Dakota.

            Cu SV Dakota Calulu hunga tres campeonato, di cual tur tres biaha SV Dakota a titula Campeon di Aruba. Calulu tabata estelar den seleccion di Antias.

            Den presencia di Calulu su yiu sra. Xiomara Beke – Comenencia e mandatario a haci entrega di e reconocemento di ‘Baluarte di Deporte’ na e legendario Calulu Comenencia.          Minister di Enseñansa y Deporte Endy Croes ta gradici Calulu pa su dedicacion y aporte den deporte di futbol na Aruba.