Rebecca Jansen a yega Aruba for di Republica Dominicana cu tres medaya

ORANJESTAD (AAN): Dialuna merdia den e vuelo di Copa Airlines a yega Aruba e hoben deportista Rebecca Jansen, kende a demostra cu nos atletanan mucha muhernan tambe ta logra cosnan grandi pa Aruba.

            Rebecca Jansen a logra di sali campeon den Pre-junior di Ciclismo den careda di contra oloshi y a laga himno di Aruba resona na Republica Dominicana. Esaki a sosode den e fin di siman cu a caba di pasa.

            Na total,  Rebecca a logra trece tres medaya: oro, plata y brons pa Aruba. E paisnan cu a participa den e campeonato aki tabata Aruba, Bermuda, Puerto Rico, St. Domingo, Belize, Sint Maarten, Bahamas, Jamaica, Barbados y Grenada.

            Den e prome dia di competencia Rebecca Jansen a logra e prome lugar den categoria pre-Junior y un di dos lugar 'overall' den damas den 'Time Trail' na e Junior Caribbean Cycling Championships na Republica Dominicana.

            Ariba e di dos dia atrobe Rebecca a logra gana un medaya di brons den e careda di circuito.

            Algo cu  mester a lamenta ta ora cu Rebecca a cay durante di un training na Santo Domingo. Sinembargo, Rebecca no a rindi y cu tur dolor el a sigui cu su participacion representando Aruba. El a bisa DIARIO cu e caida a sosode tres of cuatro dia prome unda su shifter a kibra.

            Aworaki Rebecca ya caba ta preparando pa otro aña cu landamento y coremento bek.