RBC ta sponsor principal di Aruba Chess Challenge 2025

ORANJESTAD (AAN): Durante un conferencia di prensa cu a tuma luga siman pasa na RBC, señor Pierre Rafini di RBC Bank,

den presencia di representantenan di Federacion di Ahedres di Aruba, señor Lazaro Bueno y señora Carol Pesqueira-Williams, a anuncia cu RBC lo ta e sponsor principal di e torneo internacional di schaak.

   Aruba Chess Challenge lo tuma luga dia 9 pa 12 di october 2025 na Embassy Suites. Esaki ta e di 17 torneo internacional bou di e nomber di Aruba Chess Challenge.

   “RBC un biaha mas ta orguyso di sostene un evento pa comunidad manera e torneo aki, cu ta beneficia tanto hoben y adultonan. RBC tin como meta pa sostene y duna bek na e comunidadnan cu nos ta sirbi door di sponsor eventonan manera e torneo aki y asina nos ta demostra nos compromiso na bienestar pa enrikece e comunidadnan den cua nos ta biba y ta traha p’e”, señor Rafini a ramarca.

   E evento aki ta ser lidera pa señora Carol Pesqueira-Williams cu ayudo di miembronan di board y un ekipo di boluntario. “Ta aprecia cu ainda tin companianan cu ta kere den desaroyo di mucha, y hobennan y adulto”, señora Pesqueira-Williams a expresa.

   Pa schaak no tin edad. E adulto mas grandi cu lo participa den e torneo tin 76 aña y e mas hoben tin 8 aña. E aña aki ta kibra un record di participante cu un total te cu awo di 155 participante local y internacional. E total di participante cu ta desea di yega ta 165 participante.

   E arbitro principal di e torneo, señor Lazaro Bueno a remarca cu torneo aki ta duna e posibilidad tambe pa selecciona hungadornan cu lo participa den e weganan olimpico di schaak.

   E torneo aki lo ta un torneo hopi intenso di 7 ronda. Publico no por drenta den e sala di wega, pero por wak e weganan via un pantaya grandi como tambe via medionan social.