Publico por a mira e miho hungadornan den evento “AVB All Stars Game”

AVB ta celebra 90 aña di existencia:

ORANJESTAD (AAN) – Señor Lacle, Presidente di Aruba Voetbal Bond, den entrevista cu DIARIO a duna informacion tocante nan evento “AVB All Stars Game” cu a tuma lugar, recientemente.

El a splica cu a trata di tres wega. E prome entre e staff y colaboradornan di AVB, y esnan cu ta yuda nan den e seleccionnan y tambe den oficina.

Lacle a splica cu hunto nan a dicidi di forma dos ekipo pa hunga contra otro, y despues a sigui cu e wega di “All Star Damas”.

El a bisa cu ultimo tempo e peticion pa futbol femenino ta creciendo y den e ocasion aki, e publico por a mira e desaroyo di futbol femenino cu ta bayendo riba bon caminda.

Despues tabata tin wega di “All Stars” cu ta forma pa e dos miho ekiponan, tanto division uno como dos, y esaki ta duna e publico un chens pa mira nan miho hungadornan den accion.

E aña aki Aruba Voetbal Bond ta cumpli 90 aña di existencia, lo tin celebracion, y nan ta pendiente di e eventonan cu nan ta bay anuncia, pero lamentablemente ainda tin covid-19 y esey ta haci cu nan tin cu wak kico nan por permiti pa e publico, pero con cu bay bin, lo sigui celebra nan 90 aniversario.