Presidente di ABBA su plannan ta entre otro pa hunto Corsow y Aruba clasifica pa Weganan Olimpico

Kingdome Series:

ORANJESTAD(AAN):  E seleccion di baseball di Corsow a yega Aruba Diaranzon y apesar di e hecho cu debi na un error nan a yega sin maleta, nan ta cla pa e Kingdome Series cu ta bay tuma lugar aki riba nos isla, unda cu e seleccionnan di Aruba, Corsow, Boneiro y Hulanda (Kingdome) ta bay hunga contra otro den e dianan nos dilanti.

Tur wega ta bay tuma lugar den stadion Nadi Croes Crismo Angela.

Presidente di ABBA Kevin James durante un conferencia di prensa a hiba palabra y a bisa cu e dianan aki ta bay ta hopi special pa Aruba y Corsow y e otro participantenan na e serie.

“For di dia cu mi a bira presidente, mi ta trahando hunto cu e presidente di e liga di baseball di Corsow como tambe cu e islanan rond di nos, riba con nos por eleva e nivel di baseball riba nos islanan”.

Pesey tabata asina importante tambe pa haya un bon sponsor pa yuda y sostene nos, pa asina nos baseball por crece na un nivel hopi mas halto, segun James.

El a splica cu tin mas proyecto cu el a pensa riba dje, unda cu por ehempel Aruba y Corsow lo uni pa traha riba esakinan.

Un di e proyectonan grandi cu James tin den mente, ta pa Aruba su seleccion di baseball clasifica y participa na Weganan Olimpico.

Segun e presidente di ABBA, e idea ta pa hunto cu hungadornan tambe di Corsow, traha un super team cu por clasifica y duna bataya na un di eventonan mas grandi di deporte.

Aruba di otro banda por yuda Corsow su seleccion cu hungadornan, pa e Serie di Caribe  den cual Corsow semper ta participa.

“Nos idea ta tambe pa organiza diferente torneo di baseball entre e islanan, cu lo yuda subi e nivel di baseball di e dos islanan”, segun James.