President di CONCACAF cu bishita breve na Aruba

 ORANJESTAD (AAN): Riba Diahuebs durante e wega entre seleccion di Aruba vs. Martinique den cuadro di CONCACAF Nations League,

tanto Arubaanse Voetbal Bond, y Ministro di Deporte Gerlien Croes a ricibi y conta cu bishita di President di CONCACAF, esta Victor Montagliani.

   Victor Montagliani ta un ehecutivo di futbol procedente di Canada.  E ta ademas vice-president di FIFA Council.  Den pasado, Montagliani tabata e president di e Asociacion di Futbol Canades for di 2012 te cu 2017.

   Un bishita corto, pero cu un gran significacion pa e futuro y desaroyo di futbol na Aruba. Ministro Gerlien a duna e president di CONCACAF hopi danki pa e interes y bishita.  El a haya chens di sinta den Eretribune pa mira e wega.

   E wega di Diahuebs anochi a finaliza cu score di 0-0.  E siguiente wega lo ta Dialuna awor, 16 di November 2026 pa 8:00 pm na Pierre-Aliker Municipal Stadium na Fort-de-France na Martinique.