Plan pa autonan di Aruba tambe participa na pa un gran show di auto clasico na Curacao

ORANJESTAD (AAN): E club di auto antiek y clasico mas bieu di e isla di Curaçao, esta ‘WabiClub Curaçao’,

e aña aki dia 31 di October ta celebrando nan di 60 aña di existencia.

   Special pa esaki, nan lo kier organiza un Car Show gigantesco na e isla di Curaçao, pa observa e aniversario aki.  Nan lo kier haya autonan clasico di e.o. Bonaire y Aruba tambe participa na esaki.  Aunke ta conoci cu e transporte cu container for di Aruba pa Curaçao ta hopi caro, toch e organizadonan na Curaçao ta spera cu di awor pa October lo por resolve tur contratiempo, y cu hopi organizacion ta presente na esaki.

   Specialmente pa esey, esnan di WabiClub Curaçao a tene un reunion live via Videocall cu diferente organizacion di Aruba cu ta atende cu autonan clasico.

   Esnan di Curaçao tin hopi deseo pa e autonan clasico di Aruba bay participa na e gran Auto Show na October 2025, cu lo ser teni den parkinglot gigantesco di Sambil Mall na e isla.  Mayoria Curasoleño ya caba conoce e clasiconan na e isla, y lo ta hopi ansioso pa mira esnan di Aruba.

   Nan lo pone un fecha special pa e participantenan di Aruba inscribi, pa nan haya nan T-shirt, Goodie Bags, y ticketnan di cuminda, etc.

   Si Aruba logra pone autonan clasico den container rumbo pa Curaçao, e ora e fechanan pa descarga aya na e isla lo ta dianan 27 y 28 di October.  Pasobra ya riba Diaranson 29 di October lo tin Recepcion di Bon Bini.  Riba Diabierna 31 di October lo bay tin na Curaçao un Misa, y despues un fiesta cu tur invitado.

   Diasabra 1 di November lo tin e Gran Carshow na Sambil.  Tin espacio pa tur miembro di WabiClub, tambe esnan di Aruba, pero tambe miembronan di demas clubnan di auto di Curaçao, y tambe clubnan di motorcycle di e isla ruman.

   Riba Diadomingo 2 di November tin e Driving Tour y despedida.  Dialuna 3 di November esnan di Aruba lo por hinca nan auto bek den container pa regresa nan isla.

   Riba potret por mira esnan di Aruba cu a bay atende e reunion Videocall, y cu ta planea di awor pa October si acaso nan lo bay acudi na Curaçao pa e gigantesco Car Show of no.  Tambe por mira algun di e autonan clasico cu Curaçao tin.