ORANJESTAD (AAN) - Antraco Aruba Group, cu cooperacion di Caquetio Chess Club, ta organisando pa prome biaha ever un partido demostrativo riba e borchi grandi.
E evento aki Sunshade Chess Afternoon lo tuma lugar awe Diamars 22 Juni for di 6’or pa 8’or anochi na Antraco Back Patio.
FIDE Instructor Maurits Dijkhoff lo duna un introduccion cortico, incluyendo con e piezanan ta move. Despues dos hungador di ahedres lo hunga un partido y splica den cortico cada zet cu nan hunga riba e borchi grandi. Djey un y tur cu ta desea, por hunga riba e borchi grandi.
Lo tin tambe 4 borchi di ahedres normal, cu holoshi, pa esnan cu kier practica cu otro. Bo kier train un apertura nobo o experimenta cu combinacionnan tactico? Esaki ta un bon chens.
Tin lugar pa 20 participante, gandi y chikito., pa hungadornan di tur edad. Pasa registra na Antraco Biz Box, na Antraco Plaza. Participacion ta gratis! Esaki ta un “warm up” pa e torneo cu Antraco Aruba Group tin planea pa organisa na final di e aña escolar aki. Bin practica boso deporte preferi y keda pendiente.
Fide Instructor Maurits Dijkhoff lo t’ey pa guia e actividad y pa contesta cualkier pregunta di publico.
