Nicole Hoevertsz ta propone pa nombra Thomas Bach como “Honorary President for Life”

Ta despedi di Presidente saliente di Comite Olimpico Internacional

ORANJESTAD (AAN): Comite Olimpico Arubano a duna di conoce cu durante e prome dia di e "144th session" di International Olympic Committee (IOC) a trata varios punto importante riba agenda, manera repasa e relato final di Olympic Agenda (Olympic Agenda 2020, Olympic Agenda 2020+5 y AI Agenda).

            Na e parti final di e sesion despues di un video honrando Presidente Bach, Sra. Nicole Hoevertsz como prome Vice Presidente di IOC a presenta un proposicion pa nombra Thomas Bach como “Honorary President for Life” di IOC.

            E logronan di presidente Bach ta mucho pa menciona den texto, pero den su speech Nicole ta logra di recapitula esaki elegantemente, enfatisando riba logronan na nivel global. Bunita pa wak ta con cu un “standing ovation” di tur persona presente, a aproba e proposicion unanimamente. Sigur un momento hopi emocionante, cu ta sirbi como e capitulo final perfecto pa asina conclui e 12 aña di trabou di presidente Bach.

            Finalmente, un gran cantidad di miembronan presente a sigui elogia Presidente Bach pa tur su logronan y kico e la nifica pa cada un di nan, yenando e sala cu hopi emocion bunita. Si ta desea di mira esaki, sigui e siguiente “Youtube” link unda por wak e “live stream” di awe, unda un video honrando Presidente Bach y Nicole su speech ta tuma luga, cuminsando na 7:14.22.