ORANJESTAD (AAN): Nicole Hoevertsz, miembro di Comite Olimpico Internacional (IOC) y
presidente di Comision di Coordinacion di Weganan Olimpico di Los Angeles 2028, ta masha contento cu e decisionnan nobo y cambio nan cu lo tin na e evento Olimpico.
Cambio y anuncionan cu a wordo haci ayera dor IOC no sigur a causa un impact grandi pa tur hende den e movimiento Olimpico. E evento aki pa prome bes lo tin mas atleta muher cu homber, cu sigur ta duna hopi di papia riba dje cu 3 aña faltando pa e gran evento. Nueb prueba mixto, aumento di equipo femenino y pasa di un igualdad di genero na Paris 2024 na un participacion di mas muher cu hombre na Los Angeles 2028, a keda como cambio principal cu IOC a informa, y cu a keda hopi bon ricibi pa atletanan, dirigentenan di deporte y prensa internacional.
“E decision tocante programa di Los Angeles 2028, ta habri un caminda masha interesante pa deporte, pa nos continente y pa igualdad di genero” Nicole Hoevertsz ta bisa como Miembro di IOC y Presidenta di Comision di Coordinacion di LA2028.
“Despues di e exito di Paris 2024, unda ta logra pa prome bes igualdad di genero den cantidad di participante (50%-50%), Los Angeles lo logra pa prome bes den historia cu lo tin mas participante muher compara cu e cantidad di participante masculino, cu lo ta un logro historico pa nos Movimiento Olimpico” Nicole ta conta como ex atleta olimpico di Aruba na natacion artistico den Los Angeles 1984. Awo falta 1191 dia cu ta separa nos di e evento deportivo mas grandi y importante den mundo, cu lo tin pa di tres bes ciudat di Los Angeles como cede principal (1932 y 1984 a wordo nan anterior).
E ciudad grandioso norteamericano no tin necesidad di mayor inversion den infrastructura. Tur escenario ta cla, cual ta permiti pa e comite organisador concentra mas den tur aspecto logistico y operacional die weganan. “LA28 lo usa escenarionan deportivo di nivel mundial cu lo ofrece pa publico y fanaticonan un experiencia inolvidabel. Nos no por lubida cu Los Angeles no tin necesidad di construi infrastructura permanente, como nan ta conta cu instalacionnan ya existente den un mercado deportivo hopi sofistica”, Nicole como miembro di “Comite Ejecutivo” di Panam Sports ta adiciona.
“Mi ta masha satisfecho cu e decisionnan di ultimo. Mi ta sigur nan lo sirbi como un impulso masha grandi pa celebracion exitoso di e Weganan Olimpico unico y historico aki, cu lo trece nos Movimiento Olimpico pa di tres bes den historia na e ciudad di Los Angeles cu ta conoci pa su gran pasion pa deporte”, Nicole Hoevertsz ta conclui.
Weganan Olimpico di Los Angeles lo tuma lugar for di 14 te 30 di juli di 2028 y lo conta cu participacion total di 11.198 atleanan, 5655 muher y 5543 homber, cu lo competi den 36 deporte cu 351 evento di medaya.
