ORANJESTAD (AAN): Den menos di 3 luna, lo tin e evento grandi di Aruba International Regatta riba e isla. Esaki lo tuma luga riba diabierna 28 di juni te cu 30 di juni na Surfside Beach.
Un evento cu sigur hopi amante di lama y di nabegacion ta anticipa, sigui pa dos dia di careda riba diasabra 29 di juni cual lo bira e prome dia, y diadomingo 30 di juni e di dos dia di careda.
Regatta ta tumando luga un poco mas trempan e aña aki pa coresponde cu e final di e aña escolar, asina dunando espacio pa hobennan cu ta nabega participa den e comienso di nan vacacion di scol.
E localidad di Regatta Village a worde movi pa e beach dilanti di Neptali Henriquez Park. E segmente ey di e beach ta hopi apropia pa loke ta e evento, cu amplio parkeo. Tin un website dedica na esaki cu ta:
www.aruba-regatta.org
Regatta ta invita tur nabegado for di Curaçao, Bonaire y otro islanan pa participa den cualkier di e categorianan di Optimist Youth, F11 Youth, Beachcats, Sunfish, Laser, Race Class I (Yachts), Cruising Class (Yachts), Live Aboard Class (Yachts), Multihull (Yachts), y Miniature Boats.
