*Aruba tin hopi talento y mester inverti den nan - ORANJESTAD(AAN): Durante varios aña caba federacionnan mundial di Muay Thai a bringa pa mas reconocimento di e deporte, incluyendo pa esaki bira un deporte Olimpico.
Recientemente Roony Boye a splica DIARIO cu porfin Muay Thai ta bay bira un deporte Olimpico, despues cu esaki a wordo dicidi den un reunion na Japon prome cu comienzo di Weganan Olimpico di Tokio.
Boye ta haya esaki un desaroyo hopi importante pa Aruba, mirando cu nos isla conoce varios practicante di Muay Thai cu a destaca den peleanan internacional contra paisnan grandi.
Atletanan di Aruba a yega di saca cara varios biaha den competencianan internacional ganando medayanan di brons y plata, mientras cu te hasta tabata tin atletanan cu a titulo campeon mundial.
Pesey Boye como e master grandi den e deporte aki a keda hopi contento cu e decision.
El a splica cu Aruba cu orguyo ta forma parti di organizacionnan mundial manera I.M.T.F, W.M.F y C.M.T.A.
Segun Boye Aruba tin hopi bringador talentoso di Muay Thai y cu awor a yega e momento pa inverti den nan tambe, pues mester traha riba e parti financiero.
https://diario.aw/categories/noticia/deporte/muay-thai-aproba-como-deporte-olimpico#sigProId1ab59135d2
