Motorcyclenan di Aruba ta rumbo pa celebra Dia di Bandera na Curaçao

ORANJESTAD (AAN): Den fin di siman, DIARIO tabata presente ora cu e proceso conoci como ‘Loading’ a tuma lugar ariba tereno di Fast Delivery Service na Camacuri.

   Esey tabata di e bikernan cu ta viahando pa hermana Isla di Curaçao, caminda nan lo ta participando na e diferente ride cu tin prepara pa Harley groupnan di e isla, relaciona cu Dia di Bandera.

   Esakinan lo tuma lugar fin di e luna aki mes.

   DIARIO a nota cu e interes ta grandi pa e amantenan di Motorsport di Aruba cu e actividad nan cu ta bay tin Curaçao, incluyendo caredanan di Drag cu tambe ta tuma lugar ariba e Isla ey.

   Pa varios dia, e cayanan na Curaçao lo ta yena cu motorcyclenan cu number MFA coriendo rond.  Cada motociclista tin di percura pa nan vehiculo ta bon asegura pa asina nan por core legalmente riba e isla.