Monica Pimentel ta avansa cu training preparando pa e proximo campeonato

ORANJESTAD (AAN): Monica Pimentel di Impact Taekwondo a avansa cu training cu e speranza cu e Pan American Youth, Cadet & Ultra Championships lo tuma luga despues di vakantie. 

            Kianna Krosendijk, Ingomar Jacobs, Deevah Loefstop, Ayleen van Geene y Alisha van Geene ta e 5 atletanan di Impact Taekwondo cu a clasifica.  

            Covid-19 a haci cu Mundo completo a wordo paralisa y tur evento a wordo cancela. Esaki a haci cu nan no por a representa Aruba. Awo cu Merca a vacuna na gran escala, e camp trainingnan a cuminsa tuma luga. Ta spera cu por logra competi e aña aki ainda.

            E atletanan a sigui train pa mantene nan mes activo y pa tene nan mes flexibel. Awo cu gobierno a flexibisa e reglanan pa deporte na Aruba, ta haci cu nan por train bek na e nivel cu semper nan a train.

            Cu esaki den mente nan lo sigui prepara pa nan metanan pa bin mas duro den 2022. Pa nan logra nan metanan lo cuminsa bek cu nan actividadnan pa recauda fondo pa asina representa Aruba. 

            Pa tur esnan cu ta interesa pa join nan team di Impact Taekwondo nan ta train na Scol Basico Washington ariba tur Diamars y Diahuebs for di 5’or pa 6’or y mey di atardi. Tin un grupo di mucha te cu adulto.