Ministro Endy Croes a reconoce Patrick Groters

El a gana medaya di oro recien

ORANJESTAD (AAN): Durante su vacacion na Aruba e hoben Patrick Groters y su ruman alavez entrenador Jordy Groters a bishita Minister di Deporte Endy Croes.

   Na final di luna di november y cuminsamento di december Aruba a participa den e prome edicion di Junior Panam Games 2021 cu a tuma luga na Cali, Colombia. E landado Patrick Groters a logra gana 2 medaya di oro y 1 medaya di plata cu e logro aki Aruba a termina na di cinco luga di diescuatro pais cu a gana medaya den landamento di Junior Panam Games 2021.

   Durante un encuentro ameno e mandatario di deporte a presenta e reconocemento Baluarte di Deporte na Patrick y a gradici’e pa su dedicacion, disciplina, trabao duro, pasion y aporte den e deporte di landamento pa pone Aruba su nomber resona internacionalmente. Danki Patrick, Aruba ta orguyoso di bo!