Ministro a felicita Rebecca Croes pa titulo di Campeon Mundial  

Den World Bench Press Championship 2023

ORANJESTAD (AAN): Diaranson ultimo, Minister di Enseñansa y Deporte Endy Croes a ricibi bishita di e hoben atleta Rebecca Croes di 22 aña di edad cu actualmente ta studiando nutricion na Haagse Hogeschool na Den Haag, Hulanda.

   Rebecca a participa den World Bench Press Championships 2023 den e categoria di Women Junior Classic di 53 kg y a sali campeon mundial. Rebecca tin 3 aña cu ta competiendo den World Bench Press Championships. Esaki ta e di 7 campeonato anual cu a tuma luga den e luna di mei na Sun City, South Africa.

   Un total di 57 participante di edad di 19 pa 23 aña a competi den e categoria di Women Junior Classic, 43-57 kg. Durante e encuentro ameno, Minister Endy Croes a entrega Rebecca un medaya di oro pa su contribucion den e desaroyo di deporte.

   Finalmente, Minister Endy Croes ta felicita Rebecca cu e titulo aki y ta dese’e hopi exito den futuro cu tanto su estudio y futuro competencianan deportivo. Aruba ta orguyoso di bo! Cu deseo, disciplina, determinacion y dedicacion ta logra.