Minister ta felicita coredonan cu a participa den e 38 edicion di Aruba International Half Marathon 2024

ORANJESTAD (AAN): Diadomingo ultimo, a tuma luga e famoso Aruba International Half Marathon.

Un magno evento deportivo cu a conta cu alrededor di 900 coredo cu a participa den diferente categoria: 21K, relay y 5K. E careda a start for di Joe Laviest Ballpark na San Nicolas y a termina den e parkeerplaats di Alhambra Mall.

            For di oranan di tempran di mainta Minister Endy Croes a yega San Nicolas pa duna e coredonan sosten y apoyo. Minister di Deporte Endy Croes a duna un speech, deseando tur e participantenan exito. Pa exactamente 5:30 di mainta, mandatario di Deporte a duna inicio oficial na e recorido di 21 km.

            Minister Endy Croes ta felicita e team di IBISA cu a organisa e gran evento deportivo aki. Tambe, ta gradici KPA, DOW, boluntarionan, team di IBISA y tur cu a contribui pa haci e careda aki exitoso.

            Cu disciplina, deseo, dedicion y determinacion ta logra. Pabien Sra. Lana Gobert y Sr. Alexander Hodge ambos di Aruba, kendenan ta e ganadonan absoluto di Aruba International Half Marathon.