Minister di Enseñanza y Deporte Sr. Endy Croes tabata presente na apertura oficial di torneo di pickleball

ORANJESTAD (AAN)-  Diadomingo ultimo na Centro Deportivo Betico Croes na Santa Cruz a tuma luga e torneo di “pickleball”. 

E tabata un ocasion special ya cu 10 di October ta dia internacional di e deporte di “pickle ball”.

“Pickleball” ta un deporte cu ta combina elementonan estilo di “badminton” y di tennis. E ta un deporte cu a crece de e ultimo añanan. Na Aruba tin diez aña caba cu “Aruba Pickle Ball Federation” a wordo lanta. 

Minister di Enseñansa y Deporte Sr. Endy Croes a wordo invita pa asisti y sera conoci cu e deporte di “pickleball”.  “Awe riba un dia special ta un honor pa mi como Minister Enseñansa di Deporte pa por asisti na e competencianan di “pickleball” cu ta tumando luga, hopi agradabel un recepcion hopi bunita pa cu e organisacion y federacion cu ta organisa e weganan di awe y cu ta duna contenido na e dia internacional di “pickleball”, e mandatario a expresa.  

Minister Endy Croes ta felicita e organisacion cu ta encarga cu e torneo, pabien na e deporte di “pickleball”, un deporte cu ta hayando hopi atencion riba e plataforma mundial y pabien na tur e atletanan di diferente edad cu ta tumando parti na e competencia aki. Di curason boso por conta cu Ministerio di Deporte.