Minister di Deporte contento cu iniciativa di Baseball5

ORANJESTAD (AAN): Na Holiday Inn Resort Aruba a tuma luga apertura oficial di seminario di Baseball5. En conexion cu e momento special aki pa deporte y pa Aruba Minster Endy Croes tabata presente pa hiba un discurso.

Baseball5 ta un formato nobo di baseball, caminda ekipo di 5 hungador ta hunga contra otro, un wega di 5 inning y 3 out.  E ta un wega innovative, rapido, y accesibel cu por hung'e tur caminda. E ekiponan ta consisti di mucha homber y mucha muher, stimulando asina igualdad di genero.

            Dia 14, 15 y 16 di december tin dos representante di World Baseball Softball Confederation ‘WBSC’ na Aruba cu lo duna splicacion na diferente scol y organisacionnan, pero tambe lo duna un seminario na diferente instructor, p’asina por cuminsa desaroya e deporte aki na Aruba. Na final di e seminario e cursistanan lo ricibi na certificado di participacion.

            Minister Endy Croes a expresa cu pe t’un placer pa ta presente na un ocasion asina special caminda baseball5 ta wordo lansa y duna sosten na e deporte nobo pa Aruba. E mandatario a sigui bisa cu na luna di october di 2017 tabatin un congreso di WBSC na Botswana, Africa caminda oficialmente e proyecto a wordo lansa na tur e miembronan di WBSC.

            Na 2017 e proyecto di Baseball5 a gana un nominacion di ‘Sport & Peace Awards’ y ‘Sport Make Simple’ e ta un deporte hopi rapido y accesibel por wordo hunga entre tur hende y no obstante esey e deporte ta riba programa Olimpico pa 2026. Hopi bunita ta pa nos por ta akinan hunto pa sera conoci cu e deporte, cu tur e stakeholders y asina un boca bisa otro e propaganda cu tin su sigui tras di esaki, e instructornan di WBSC cu ta na Aruba ta duna e conocemento con ta hunga e wega aki.            Ministerio di Deporte lo tin cu etala, brasa y carga esaki brinda oportunidad na tur nos hobennan. Na mes momento esaki ta un oportunidad pa nos hobennan practica un deporte nobo y asina tin e posibilidad di yega na participa den e Youth Olympic Games na 2026.

            E Mandatario a sigui bisa; mi a compronde cu e deporte a wordo introduci na dos scol basico na San Nicolas; Sint Paulus y Colegio Santa Filomena como tambe na Santa Cruz na Maria School y Colegio San Hose.

            E reaccion tabata hopi positivo. Esaki ta un ehempel con pa hiba e deporte cerca e muchanan. Minister Endy Croes ta gradici Comite Olimpico Arubano, IBiSA, WBSC, sr. Randolph Oduber y sr. Lyrick Pourier y tur e boluntarionan pa haci e proyecto aki un realidad.