Minister di deporte a bishita entrenamento di prospectonan local y peloteronan profesional

ORANJESTAD  (AAN): Minister Endy Croes tabata presente na stadion Nadi Croes/Crismo Angela Baseball Park

unda a bishita entrenamento di nos prospectonan local y peloteronan profesional kendenan ta den ful preparacion y entrenamento pe temporada 2022 cu lo inicia pronto.

            Minister Endy Croes a combersa cu Eugene Kingsale kende a elabora con e programa di entrenamento ta wordo preprara. Banda di ta traha riba e preparacion fisico, ta traha riba entre otro; bateo, coremento di base y diferente otro ehercicionan. Tambe por a mira peloteronan profesional di ‘Big League’ manera Otto Lopez di Toronto Blue Jays presente hunto cu diferente peloteronan cu ta den ‘Minor League’ manera Brandon Hernandez, Charles Leblanc, Narciso Crook y Francisco Hernandez kendenan ta na Aruba hunto cu nos gran pelotero Chadwick Tromp.

            Minister Endy Croes a hiba palabra y motiva nos peloteronan pa sigui haci nan miho esfuerso, traha duro cu dedicacion, determinacion y disciplina nan por logra nan deseo y soñonan.

            ‘Nos ta contento y satisfecho con e entrenamento di e peloteronan firma y esun di ‘College’ ta bayendo’, e mandatario a expresa.  Por ultimo Minister Endy Croes ta desea tur nos peloteronan hopi exito durante nan temporada nobo di baseball 2022 y cu por conta cu sosten di Ministerio di Deporte!