ORANJESTAD (AAN): Diasabra atardi, Minister Endy Croes a topa cu e atleta Mikel Schreuders cu a yega Aruba for di El Salvador.
Recientemente, Mikel Schreuders a competi den Weganan Centro Americano y di Caribe (CAC) cu a tuma luga na San Salvador. Mikel Schreuders a competi den e disciplina di natacion unda el a conkista 4 medaya; 1 di medaya di oro y 3 medaya di plata. Minister Endy Croes a comparti un momento ameno cu Mikel Schreuders y su mayornan Sr. Bert y Sra. Monica prome cu Mikel a sali pa Europa. Mikel a comparti cu Minister Endy Croes di e competencia y e momento cu a gana medaya di oro.
Mikel Schreuders a expresa di ta hopi orguyoso di por a representa Aruba na Weganan Centro Americano y di Caribe. Un isla asina chikito y nos a mustra Caribe y Centro America cu nos ta un pais riba e mapa y orguyoso di nos bandera. Mikel ta sigui cu su preparacionnan na Francia pa aki tres siman competi den World Championships cu ta tuma luga na Hapon. Fin di october di e aña aki Mikel ta competi den Weganan Panamericano. Na luna di juli 2024 Mikel Schreuders ta competi den Weganan Olimpico 2024 cu ta tuma luga na Paris.
Pa conclui, Minister Endy Croes a enfatisa cu Aruba ta hopi orguyoso di e trabounan duro cu ta resalta di Mikel Schreuders. Nos atletanan y bandera di Aruba a resalta den e grandinan rond di mundo. Minister Endy Croes ta sumamente orguyoso di tur nos atletanan cu a participa na e weganan CAC 2023. Minister Endy Croes ta desea tur nos atletanan cu ta competi e siman aki na CAC 2023 hopi exito.
Mandatario di Deporte ta desea Mikel tur clase di exito cu su preparacion pa e proximo competencianan. Cu deseo, disciplina, dedicacion y determinacion bo ta logra. Bay p’e Mikel! Hopi exito y conta cu nos sosten.
