Miembronan di Asamblea General di AVA uni pa continuidad cu bon gobernacion y futuro di volleyball

Asociacion di Volleyball a crea claridad

ORANJESTAD (AAN): Dialuna 7 di september 2026, tur 9 club miembro di Asamblea General di Aruba Volleyball Association (AVA) a uni pa convoca y participa den un Asamblea General Extraordinario, cu e meta di crea claridad, continuidad y un caminda responsable pa futuro di volleyball na Aruba.

   E nuebe miembronan di Asamblea General ta: Pickleball Association, Y.M.C.A., Comision Pro Basketball, S.V. La Fama, S.V. Velocidad, S.V. Unistars, Centro di Bario Noord, Synergy Volleyball Aruba y S.V. Britannia.

   E reunion a wordo modera profesionalmente pa Señora Sorayda Boekhoudt, Presidente di Aruba Sport Unie (ASU), organizacion madre di AVA y a conta cu presencia y guia di Señora Nicole Hoevertsz, Secretaria General di Comite Olimpico Arubano (COA) hunto cu Sr. Jonathan Wever, como observadornan den contexto di AVA su relacionnan cu e organizascion internacional FIVB, y regional NORCECA y CAZOVA.

   Den un ambiente constructivo, respetuoso y orienta riba solucion, miembronan a dialoga tocante e situacion actual, continuidad di e organizacion y e pasonan necesario pa fortalece nuevamente e structura di AVA. Durante e reunion, enfasis a wordo poni riba bon gobernacion, integridad, transparencia, comunicacion habri, responsabilidad y cooperacion entre tur e miembronan y directiva.

   Como resultado, Asamblea General a acorda pa establece un directiva interino den forma di diferente comisionnan, cu lo traha hunto pa atende tur asunto pendiente, garantisa continuidad di e trabaonan di AVA y pone tur condicionnan necesario na luga pa tene eleccionnan democratico prome cu fin di januari 2027.

   E reunion a termina cu un compromiso comparti pa traha den bienestar di nos hobennan, nos atletanan, e deporte di volleyball door di e miembronan di Asamblea General y e federacion di AVA. Cu dialogo, integridad y cooperacion, Asamblea General a pone un paso importante pa un AVA mas fuerte, transparente y prepara pa sirbi e proximo generacion.