Pa prome biaha den historia
ORANJESTAD (AAN): E evento di “Aruba Open Beach Tennis Championships”, un di e eventonan mas iconico den e ITF Beach Tennis World Tour, ta bolbe na Bushiri Beach for di 10 pa 17 di November venidero.
Pa prome biaha den su historia, e evento di ocho dia lo rekeri un entrada nominal, marcando un cambio significante den e manera cu e ta ser presenta na comunidad y invitadonan internacional.
E decision pa introduci entrada cu carchi ta parti di un iniciativa mas amplio pa mehora siguridad y sigura un experiencia sigur y anima pa hungadornan y fanaticada. Tradicionalmente un evento gratis, Aruba Open su sistema nobo di ticket ta diseña pa ofrece e bishitantenan un ambiente sigur y premium. E compra di un solo ticket di entrada ta duna acceso na tur e ocho dianan di evento. E hungadonan registra di Aruba Open no tin cu cumpra carchi.
Garantisando e Futuro di Aruba Open: “Nos meta ta pa salvaguardia e continuacion di e Aruba Open Beach Tennis Championships y pa sigui provee un experiencia excepcional pa tur hungador y espectador”, Sjoerd de Vries, organizador di Aruba Open, a bisa. “Introduccion di e systema di entrada cu ticket tabata un decision dificil, pero ta un paso necesario pa mantene e status premium di nos evento y ofrece e miho experiencia posibel”.
Durante e ultimo añanan, e necesidad pa siguridad a bira mas y mas evidente. E feedback di e partnernan di Aruba Open, hungadornan local y internacional di beach tennis, espectadornan y comerciantenan a subraya e importancia pa crea un ambiente sigur.
E organizadornan mes tambe a tuma nota di e necesidad aki, particularmente despues di e incidentenan cu a tuma lugar na e evento di aña pasa, incluyendo varios alteracion, cu a subraya e urgencia pa e cambio aki. Mientras cu e organizadornan lo prefera pa Aruba Open keda un evento gratis, e decision pa implementa un systema di ticket a worde tuma pa proteha tur hende envolvi y preserva e ambiente iconico di e evento aña tras di aña.
Aruba Open ta sigui atrae talento di nivel halto, treciendo mas di 1.200 hungadornan for di mas cu 40 pais tur aña. Aruba ta anfitrion di Aruba Open Beach Tennis Championships pa mas cu un decada, y a crece tremendamente desde su inicio. Aruba Open su reputacion ta conoci mundialmente, y cu su invitacion pa uni cu e prestigioso circuito ITF Sand Series e aña aki, e lo establece un standard nobo cu un premio record di $95.000, cu lo worde distribui den varios categoria di e competencia.
