Leftovers a titula campeon di Baseball 40 plus

ORANJESTAD(AAN): Den fin di siman den un stadion Nadi Croes/Crismo Angela bastante yen y yena cu ambiente, Leftovers a titulo campeon di baseball 40 plus pa di dos biaha desde cu a cuminza cu e campeonato aki.

Nan contrincante tabata campeon di aña pasa Spuiters, cu a hunga un bon wega tambe.

Leftovers a gana e prome wega di e serie final y Spuiters a gana e di dos wega.

Den e wega decisivo Diasabra Spuiters a bay ariba 4-2, despues cu trempan Leftovers a bay ariba 2-0.

Sinembargo den di 7 inning cu e score 4-4, Anwar Geerman y Giovanni Lane a impulsa 2 careda, pa pone e score final na 6-4.

Pitcher ganador tabata Robby Albertus, mientras cu pitcher perdedor tabata Richard Flannegin.

Pa Spuiters a destaca na plato Eddie Flannegin, Win Dabian y tambe Richard Simon, kende a impulsa 2 careda.

Pa Leftovers a destaca na plato Tony Hassel, Bryan Elisabeth, Anwar Geerman, Carlos Croes 1-1 y tambe Joseph Maduro kende a impulsa careda.