Kyra Hoevertsz a sali den di cuater posicion den 'World Aquatics World Cup 2025'

ORANJESTAD (AAN): Landado artistico di Aruba, Kyra Hoevertsz, a completa un temporada excepcional den 'World Aquatics Artistic Swimming World Cup 2025',

cu un sobresaliente di 4 lugar final den categoria Free Femenino. Aunke a keda hopi cerca di un podium, Hoevertsz a laga cla cu e ta forma parti di e grupo elite mundial den e deporte.

            Kyra a participa den cuater competencia internacional: Paris (Francia), Somabay (Egipto), Markham (Canada) i e Super Final na Xi’an (China), caminda su presentacionnan tanto den Free Technical  como Solo Free tabata consistentemente fuerte. E presentacionnan tabata huzga riba dificultad, ehecucion y impresion artistico.

Durante e temporada, Hoevertsz a logra gana dos medaya di brons:

Solo Free – Paris, Francia

Solo Free – Markham, Canada

            E resultadonan aki a contribui importantemente na su ranking total di 4 lugar, demostrando su forsa, talento artistico y compromiso den un tereno global cu ta bira mas competitivo.

            “E logronan di Kyra e temporada aki ta refleha su resistencia, talento y e desaroyo continuo di swimming artistico na Aruba,” un vocero di Aruba Aquatics a bisa. “E ta sigui inspira un generacion nobo di atletanan den nos region.”

            Kyra Hoevertsz a representa Aruba ampliamente riba e escena internacional, y su campaña 2025 ta pone Aruba riba e mapa mundial den deporte acuatico. E logronan di Kyra ta resalta no solamente su desaroyo personal, sino tambe e crecemento di representacion Caribense den e deporte.

            Awor cu e World Cup temporada a caba, Hoevertsz ta bolbe Aruba pa cuminsa preparacion pa e World Aquatics Championships 2025 na Singapore, cu lo tuma luga den juli, caminda e lo midi forsa di atrobe cu e miho 'soloists' mundial. 

Proximo evento local: Campeonato Arubano di Swimming Artistico

Di 27 te 29 di juni, Aruba lo ta anfitrion di e Campeonato Arubano di Swimming Artistico, cu lo tin participacion di e miho landadonan di e isla den rutina solo, duo y team. Bin duna apoyo na e atletanan y yuda nan prepara pa e escena internacional. Publico ta invita pa asisti y sostene e talentonan local.