Cu campaña di ‘Move pa Biba’
ORANJESTAD (AAN): Manera DIARIO a trece dilanti caba e comienzo di siman aki, ta asina cu awe Diaranson 6 di april ta dia Mundial di Actividad Fisico. Fecha cu ta worde celebra internacionalmente cu diferente actividad pa entre otro duna informacion y educa e communidad di e importancia di actividad fisico.
E tema pa Dia Mundial di Actividad fisico e aña aki ta “Move pa biba”. Door di haci actividad fisico, movecion of deporte bo ta mehora bo salud y calidad di bida. Movecion ta hopi importante pa nos keda activo, energetico y saludabel y asina hiba un bida mas satisfactorio. Ta cientificamente comproba cu movecion tin efecto positivo riba nos salud fisico y mental. E no ta solamente beneficioso pa nos musculonan, ader, curason, circulacion di sanger, nivel di sucu, presion etc. Movecion ta importante tambe pa distrai bo mes, pa relaha, focus riba algo otro cu no ta bo problemanan of preocupacionnan. Cu otro palabra e ta yuda bo baha stress.
Tin diferente manera pa por haya e beneficionan aki riba menciona cual por varia pa tur hende. Algun ehempel ta hike, cana, core , landa, traha na cas, den cura, bay gym of haci deporte. Tur siman pone meta pa yega na 150 minuut of 2 ½ ora di movecion cu ta pone bo curason bati mas duro cu normal. Agrega algun movecion pa bo musculonan, manera push-up of sit-ups, 2-3 biaha biaha pa siman. Bo ta bay ta mas saludabel, sinti miho, mustra miho y pensa miho tambe! Corda di check cu bo dokter di cas prome cu cuminsa cualkier actividad fisico of deporte.
IBiSA conhuntamente cu Fundacion Movemento ta Bida ta haci un cordial invitacion na tur persona, grupo of instancia/negoshi pa haci actividad fisico riba e dia aki. No lag’e na e dia aki so sino laga esaki ta e comienso di un cambio den bo bida pa uno mas activo. Acumula 150 minuut of 2 ½ ora pa siman pa mantene bo salud. Esaki por ta p.e. 30 minuut 5 biaha pa siman. IBiSA tin diferente foyeto di actividad fisico y salud disponibel.
