William Erasmus, Director Interino IBiSA:
- Lo incorpora algun deporte mas pa weganan interinsular
ORANJESTAD (AAN) Señor William Erasmus, Director Interino di Instituto Biba Saludable y Activo (IBiSA, a yama un conferencia di prensa, pa marca e inicio di Deporte Escolar 2025-2026.
“Prome cu tur cos mi tin cu yama danki na tur e partnernan di scol, docente, coordinadornan di deporte, pa nos tabata tin un temporada 2024-2025, hopi exitoso. Mi kier a menciona cu aña pasa den actividadnan secular, nos tabatin un cantidad aproxima di 5 mil mucha cu a participa den deporte escolar, y esaki contando tur e otro productonan cu nos tabata tin, entre otro e weganan escolar, y weganan interinsular.
“Pa weganan interinsular, nos tabata tin mas of menos 120 mucha di Aruba, cu a participa den e weganan aki, unda cu di e grupo aki algun a bay Bonaire, algun a bay Curacao, y algun a participa na final di e weganan internacional na Aruba.
“Tambe nos tabata tin e final di e weganan escolar, cual clasificacion a tuma lugar durante deporte escolar, y despues na fin di aña nos tabatin e final di e weganan interinsular unda mas of menos mil mucha a participa den e competencianan aki”, William Erasmus a señala.
Señor Erasmus a anuncia cu tin un producto nobo cu IBiSA ta bay introduci y cu a wordo introduci caba door di Minister, cual ta bay engrandece e producto di deporte escolar cu tin actualmente.
“Mas cu claro, pa e temporada 2025-2026 nos tin un meta cual ta, sobrepasa e cifranan cu nos tabata tin, y nos ta spera cu e productonan nobo cu nos a haya aworaki y tambe cu e incorporacion di algun deporte mas na e weganan interinsular, nos ta bay logra e meta aki” William Erasmus a declara.
