Hitters Volleyball Club a gana Diaranson den wega cu a dura 2 ora

ORANJESTAD (AAN): Diaranson anochi den un Centro Deportivo Betico Croes bon anima e damanan di A-klas di Hitters Volleyball Club a sa di cuminsa e campeonatio national di Volleyball cu un victoria  riba e equipo di Volleyball Positivo.

E damasnan di Hitters na luna di September e aña aki a bin hunto pa prome biaha pa asina forma e A-klas di Hitters cu ja caba desde 2024 tin team activo den e categoría U-15 y U-19.

   E wega a cuminsa unda Hitters tabata domina den e prome set y a bay dilanti te 15-7, pero door di descuido y algun bruhamento Volleyball Positivo a sa di bolter cos y gana e prome set cu 26-24.

   Den di dos set Volleyball Positivo a cuminsa e set determina y a sa di bay dilanti, pero Hitters a mane wake up y a bolter cos y bay gana e set cu 25-21.

   E di tres set Hitters a sa di domina e wega mas miho, y a gana e set cu 25-20. Mirando cu e presion ta riba Volleyball positivo pa gana e di 4 set, nan a cuminsa haci hopi fout den nan wega. Hitters a sa di probecha y domina e wega pa asina gana e di 4 set pa 25-12.

   Un wega cu sigur tabata tin hopi tenshon vooral cu e wega a dura 2 ora den su totalidad unda cansancio tambe a hunga un rol den e wega aki. Asina aki Hitters ta logra su prome 4 puntonan di campeonato National di Volleyball di Aruba organiza door di Aruba Volleyball Association (AVA).

   Awe Diabierna e campeonato ta continua unda cu Hitters U15 lo ta enfrentando Fast Breakers 2 pa 6or di atardi na Centro Deportivo Playa (Colegio Arubano) Y diasabra tambe tin wega unda cu Hitters U-19 lo ta enfrentando Fast Breakers pa 7or di anochi na Centro Deportivo Playa (Colegio Arubano).