HIAS ta invita henter comunidad pa apoya e gruponan di Kicking ball na Riverplate Diadomingo proximo  

ORANJESTAD (AAN)—Xinara Raymond, “Oficial di proteccion basico comunitario” na HIAS, den entrevista cu DIARIO, a splica cu nan ta organizando un actividad di kicking ball, den colaboracion cu UNHCR.

Kicking ball, ta un deporte hopi conoci na Venezuela unda basicamente ta hunga cu e reglanan di baseball pero cu pia.

            Xinara a splica cu e deporte aki ta manera un fusion di baseball cu futbol, y ta hopi popular na Venezuela, pero no tanto na Aruba. “Y mirando cu nos di HISAS- ACNUR (Agencia di Nacionnan Uni pa e Refugiadonan), unda nos pilarnan ta inclusion y integracion, a dicidi pa organiza un wega unda hende por bin, e comunidad cu nos ta atende y e comunidad local, pa presencia kico ta e Kicking ball.

E actividad a cuminza dia 15 di October unda tres ekipo a hunga contra otro y Diadomingo awo, dia 22, lo tin e ultimo partido cu mester hunga anto e final”, Xinara Raymond a duna di conoce.

            Xinara a menciona cu actualmente e gruponan cu ta practica e deporte aki ta Venezolano, pasobra e no ta mucho popular na Aruba. Pero poco, poco e ta creciendo unda integrantenan local ta drenta den e gruponan aki pa practica e deporte aki.

            “Pesey tambe no ta organis’e pa nos duna bista na kico e ta, pa nos por zorg pasobra hende muher so ta interesa pa bira y forma parti di e gruponan existente aki. Pero aworaki mayormente ta Venezolano”, Xinara a señala.

            El a agrega cu no ta solamente tin un aspecto deportivo pero e ta trata tambe pa ser conoci cu otro, e diferente culturanan, e personalidad, e idioma, pasobra ora e beneficiarionan di HIAS bin Aruba nan mester integra den tur aspecto, y un di nan ta keda semper e Idioma Papiamento, cu nan ta atende curso di esaki na HIAS, y ta un momento hopi bunita, Xinara a expresa, pasobra tanten bo ta hunga un deporte bo ta socializa.

            Xinara a subraya cu tur actividad di HIAS ta completamente gratis. “Mi kier reitera esey, HIAS y ACNUR, nunca ta cobra pa nada. Nos actividadnan ta sin fines di lucro”, el a reitera.

E wega ta bay ta na Riverplate na Madiki. Ta bay cuminza un tiki mas trempan e biaha aki (Diadomingo cu ta bin), atardi di 4.30 pa 9’or di anochi.

            Xinara a bisa cu e actividad aki e prome biaha a bay super bon, pero toch nan ta sinti falta pa un tiki mas di e comunidad local, ta presente. Xinara ta invita henter pueblo di Aruba pa diadomingo awo, dia 22 di October, bin apoya e gruponan na di Kicking ball, ,a Riverplate.