Henny Leo celebrando su di 50 aña den mundo di Dragracing

Saludos na tur fanatico di Speedworld, awe nos tin un homenahe special dedica na e gran Henny Leo, un di e pioneronan den mundo di Dragracing na Aruba.  Y e hecho cu e ta observando su di 50 aniversario den mundo di careda na Aruba.

   Hendrick ‘Henny’ Leo a nace na Aruba dia 28 di October 1939 na Plantage Sividivi cerca di Hospital Bieu na Playa.  Gran parti di su bida el a traha como chauffeur di Truck y mecanico.  For di edad hoben caba e tabatin pasion pa motor, esta tur internal combustion engine pa auto, brommer, motorcycle, etc.

   Awor cu e tin 81 aña di edad, e ta corda tempo e tabatin 13 aña di edad caba el a cuminza traha riba auto.  E tabata reta su mes pa purba start un auto.  Despues e tabatin suerte cu el a haya amigonan di su tata cu tabata mecanico, incluyendo un bodyman cu tabata nan bisiña, y nan a acept’e cu den fin di siman Henny ta bay na nan shap pa siña haci algo cu autonan.  El a keda haya experiencia den tur loke tin di haber cu mundo di motor.

  AMOR PA MOTOR:

   Ora el a yega 18 aña e compasion pa mundo di motor a keda haya mas atencion, pero tambe e tabatin momento cu el a enamora tambe di su futuro casa.  E mesun epoca ey el a topa cu su amigonan di scol, esta Shon Pa Lopez y Jossy Flanegin, cu a empuhe den e mundo di pustamento di auto.  Pero e tempo ey no tabatin pista di careda.  Ta djis riba caya autonan ta pusta riba Boulevard na Playa.  Asina el a bin haya sa cu tin caredanan riba caya tambe for di San Nicolas te Playa, y tambe na Barcadera.

   Como cu e caredanan ta riba caya, for di e tempo ey caba Henny Leo a cuminza haya e soño, e speranza, y e vision pa legaliza e caredanan aki.  Di trempan a purba di organiza e caredanan ilegal aki un tiki mihor.  Pasobra anteriormente tur careda riba caya tabata coremento pa loco, ta causa accident.  Asina a cuminza na stipula un horario y lugar pa pusta, y ta pone spotters bay check di leu si acaso tin Polis ta yegando.  Y tambe nan tabata trata na cera e skinanan, pa evita cu chauffeurnan inocente por yega y cruza net durante un pustamento.  Aunke e tempo aya Aruba no tabatin mucho auto.  No tabatin asina hopi trafico durante e periodo ey.

   Segun Leo, durante aña 1957 cu a traha Boulevard, e caminda pa pusta a bira mihor.

   Henny a conta cu el a casa hopi hoben, y el a sigui cu su hobby di auto y motor.  Aki nan a cuminza cu e reto pa fine-tune y traha un mihor auto cada biaha cu mihor horsepower, pa por participa cu nan den e caredanan clandestino.

   DRAGRACE NA CORSOW:

   Durante 1963 a logra pa lanta e prome Asociacion di Auto na Aruba, y esey a bira Asociacion ARA.  Su amigonan mas cercano Shon Pa Lopez y Flanegin, como tambe Chico Croeze, Silvio Varis, Frans Varis, Ronnie Toppenberg, Celvin Houtman, Seppy Mazeroski a lanta esaki.  Nan a purba tur manera pa obtene un tereno unda nan por a habri un pista di careda.  Pero Gobernantenan e tempo aya tabata mira nan djis como un grupo di hoben malcria.  Pesey nunca no a logre.  Toch nan no a laga e lucha cay.  Nan a sigui busca y trata na forza pa haya tereno.

   Diripiente na aña 1971 a bin e noticia, cu Curaçao a legaliza y organiza e prome caredanan di Dragrace na e pista di Koral Tabak.  Na Aruba mesora e team di Henny a reuni pa asina hunto cu Chico Croeze, Silvio Varis, y Frans Varis, a lanta e team “Leo’s Racing”.  Nan a bira e prome team oficial di Dragrace di Aruba, cu a bay pa asina competi na e prome caredanan di Dragrace na Curacao, riba Diabierna 30 April 1971.  “Nos tabatin hopi exito na Curacao,” Henny a indica.

   “Nos tabatin epoca dushi, y mi lo keda recorda pa semper nos prome aña di Dragracing na April 1971 na Curacao,” Leo a indica.  E competencianan ey na Curacao tabata pa recauda fondo pa Mgr. Verriet Instituut Curacao, cu ta un centro di revalidacion pa hobennan cu dificultad fisico.  E prome careda ta esencialmente pa yuda recauda fondo.

   E invitacion ey a bin inespera na Aruba.  Leo’s Racing e momento ey tabatin un auto cu un motor kibra sin cu por a haya pieza.  Diripiente un amigo a duna nan un Motor-Block bieu, y e team a arma esaki.  Nan a cruza nan dede ora di trata na start e motor, y el a logra cende toch!  Pues nan tin auto, y nan tin motor cla pa bay pusta na Curacao.  Pero aki a bin realiza un problema grandi:  Con ta haci hiba e auto aki pa Curacao?

   Pa suerte e temporada ey, tabatin un señor Duvet cu ta trece Baca bibo for di Colombia, baha na Aruba, y hiba e resto pa Corsow.  Aki Chico Croeze a bay papia cu señor Duvet, y a logra convence pa e por laga nan auto di careda haya un ‘lift’ for di Aruba y baha na Corsow.  Despues di pensa un rato, señor Duvet a bay di acuerdo.

   Henny Leo ainda ta corda con nan a bay Waf cu e auto, caminda riba e barco nan a hala e Bacanan un banda y a logra haya un espacio chikito pa e auto por a staciona eynan.  E team di Leo’s Racing tambe a bay Corsow abordo di e barco aki.  Ora di yega Corsow, mester a baha e auto y bay laba esaki pasobra sushedad di baca a laga e auto den forma cu no tabata bista.

   Na Curacao como cu nan a yega sin e papeleo necesario, tabata señor Charlie Moron cu a para garantia pa nan saca e auto.  Y asina nan a yega na e pista di careda na Koral Tabak.  Segun Henny Leo, nan a djis bay eynan pa pasa pret, y goza di e competencianan.  Nan sa cu nan motor ta uno bieu cu sigur lo no yuda nan cu mucho cos.  Sinembargo nan a pone un aditivo di e marca STP den e motor, y esaki a mehora e Motor-Block ey na un forma cu el a hasta rejuvenece e motor.

   “Y nos a gana tur careda, y a laga diferente hende stuur durante e caredanan,” Henny Leo a bisa.  Incluyendo Charlie Moron cu a bay tras di stuur.  Otronan cu a stuur tabata Chico Croeze y esnan Varis tambe.  Tur auto na Curacao a line-up pa competi contra e auto di Aruba, pero na final e motor a laga bay, y nan a perde e careda di final.  Esun cu a gana nan, a wordo considera e ‘heroe di dia’.

   Ora cu a bin cu servicio di Ferry entre Aruba y Curacao, por corda con barco tabata bay yen-yen di fanatico rumbo pa Corsow pa wak caredanan na Koral Tabak.  Aruba e tempo ey ainda no tin pista, pues ta tur hende ta bay pasa nan long weekend di Aña di La Reina y Dia di Obrero pa e caredanan na Corsow.  Asina poco-poco Gobierno di Aruba a cuminza realiza ta con grandi e interes ta pa e deporte di motor aki entre ciudadanonan local.

   LITERATURA BALIOSO:

   Henny tabata berdaderamente e mecanico cu a forza y traha riba e motornan di Leo’s Racing.  El a fortifica su conocemento for di trempan cumprando hopi buki esencial cu tabata duna guia experto con pa fine-tune un motor pa haci esaki apto pa careda, cu mas torque y horsepower pa core mihor. Ainda Henny Leo tin e bukinan aki poni na su cas pa tur hende mira!  E bukinan aki a yuda e team grandemente den conseho pa por sigui sobresali.

   E tempo aya no tabatin tecnologia moderno, y e bukinan aki a empuha nan pa por traha riba nan mesun modificacionnan, ahusta ignition timing, haci invento, pa asina motornan di nan auto tin mihor output.  Awendia ta djis setting di computer bo ta cambia pa haya un mihor motor.

   Prome cu e caredanan inaugural na Curacao, semper Henny tabata djis mecanico.  Pero pa e caredanan na Curacao, el a sa di bay tras di stuur, y a core pa su team pa prome biaha.  El a keda core di e tempo ey 1971, straight te na aña 2016, ora cu e mester a stop di core debi na problema cu su bista.  El a haci un operacion di catarata cu no tabata exitoso, y pesey a retira.

   Despues di esey, a tuma un pauza pero a sigui pa lanta un team “Godfather Racing Team” na Curacao pero cu ta cay bao di Leo’s Racing Team. E tabata duna nan un man.

   Na mesun aña di 1971, Leo’s Racing Team a yuda lanta Fundacion Stichting Aruba Motor Sports (SAMS), cu mesun amigonan den e maneho, cu a purba tur forma pa traha un pista.  A trata prome na Lagabena, pero como cu e tereno ta chikito, autoridadnan na aña 1971 a stop nan.  Cada rato diferente gobierno a priminti nan di lo yuda haya un tereno, pero a keda warda, y warda y nada a socede.

   PALO MARGA:

   Mas di un decada despues, esta na 1983 porfin Gobierno a ofrece tereno di Palo Marga, cu a bira realidad danki na Leo’s Racing.  A traha riba e pista aki y asina poco poco a keda mantene y expande te na loke e ta awor.

   Henny Leo a splica cu e ta sumamente satisfecho cu e logronan di su team.  Tabatin victorianan grandi cu Leo’s Racing a sa di celebra cune. Dado momento ta tur hende riba e isla aki conoce Leo’s Racing y su vehiculonan.  Pero pa Henny Leo, e logro di mas grandi ta e hecho cu un di nan vehiculo traha na Aruba, a sali grandemente riba portada di revista “Super Stock” imprimi na Merca y cu a bay rond di mundo.

   E famoso auto di careda Toyota di Leo’s Racing, a sali tambe den revista di Toyota Japan cu a circula rond mundo.  Tabatin e honor tambe e temporada ey di wordo nombra como “Tata di Dragracing” na Aruba.

   Pues por a mira cu e soño di Henny Leo poco-poco a bira realidad.  Fastioso ta cu awor ta den temporada di celebra 50 aña di Leo’s Racing, 50 aña di Dragracing, y 38 aña di Palo Marga, pero lamentablemente e so a keda.  Pues tur esnan cu a lante, manera Chico Croeze, Shon Pa Lopez, Silvio Varis, Frans Varis, Ronnie Toppenberg, etc., nan tur a bay laga nos caba.

   “Awor mi ta celebre mi so, pero recordando nan y gradici semper na nan cu toch nos a yega asina leu,” Henny Leo a indica.  E ta contento tambe cu su yiu homber Giovanni Leo a produci un buki conmemorativo di 50 Aña di Leo’s Racing Team, cu ta documenta tur detaye di nan existencia.

   Henny Leo su deseo di mas grandi ta cu e deporte di Dragrace no cay na Aruba!  Fuera di esey e tin hopi agradecimento den direccion di su querida señora kende tur e añanan para su tras, nunca a reclame.  Y ta hopi placa a wordo gasta, como cu e team tabatin un total di 7 auto, incluyendo uno nobo-nobo traha bunita, y a bolter cune y perde.

   Su famia semper a sostene 100%, den tur e viahenan cu el a haci pa exterior pa busca pieza pa e vehiculonan.  E ta hopi contento pa e respaldo y empuhe di tur hende, y awor nan tin bunita recuerdo di tur e competencianan aki.  E lo tin deseo pa su amigonan cu semper a duna un man, pa bishite e siman aki como cu e ta un siman importante pa historia di motorsport na Aruba.

   DIARIO como tambe Speedworld ta felicita Henny Leo, su famia, y tur esnan cu a forma parti di Leo’s Racing Team, cu Diabierna awor ta marca 50 aña cu oficialmente nan ta den mundo di careda di dragrace.