Grupo Flor di Aloe a sali subcampeon den e Olimpiada Adulto na Boneiro

ORANJESTAD (AAN) – Diasabra ultimo e grupo di adulto Flor di Aloe a representa Aruba na e Olimpiada Adulto na Bonaire caminda e grupo aki a logra sali subcampeon.

E grupo Flor di Aloe a biaha cu un delegacion di 17 persona y entre nan Giovanni Leocadia cu a bay como coach di FMTB y tambe Natalie Carlo di FMTB.

Na e olimpiada a participa  6 grupo di Boneiro y 1 grupo di Aruba cu ta Flor di Aloe cu a participa pa prome biaha na e campeonato aki.

E idea tras di e actividad aki ta pa tin algo recreativo, pa socialisa y keda activo.

Mester bisa cu e grupo Flor di Aloe tabata sumamente activo den e olimpiada aki, ya cu te cu 6 wega nan tabata na prome lugar. Despues di 6 wega tabata tin 1 punto di diferencia. Na e ultimo wega tabata tin un empate y mester a bay na un wega di desempate entre e Grupo Antriol y Grupo Flor di Aloe caminda e Grupo di Antriol a sali campeon pa di 3 aña consecutivo y Flor di Aloe a keda sub campeon.

Un pabien na grupo Flor di Aloe cu a sa di duna un tremendo presentacion na Boneiro.