ORANJESTAD (AAN) - Aruba Voetbal Bond (AVB) y Koninklijke Nederlandse Voetbalbond (KNVB) ta traha hunto pa sigui desaroya futbol na Aruba.
Den e caso aki KNVB ta presente pa mira y haya sa mas con futbol femenino na Aruba ta hinca den otro. Tambe pa traha riba e fundeshi pa mas mucha muhe participa den e categoria di damas.
Roos Brouwer, coordinador di desaroyo di futbol di KNVB, ta na Aruba y e tin un mision. “Mi mision ta pa yuda AVB cu desaroyo di futbol di damas. Nan tin un bunita plan pa e categoria aki y kier sigui yuda cu ne”, tabata su palabranan. A topa diferente persona, entre otro coach, hungado, hendenan di e bond, pa asina haya un miho bista con futbol di damas na Aruba ta organisa y ki contribucion Hulanda por duna.
Brouwer ta sigui bisa cu ta conoci cu e seleccion di Reino ta duna un bon presentacion. Pronto durante weganan Olimpico, Hulanda lo tin bon bista riba nan. Fuera di esey tin mas mucha muhe cu ta bay hunga futbol y ta bon pa tin un bon base pa asina desaroya hende muhe den e deporte aki. E meta ta pa pone e fundeshi aki tambe na Aruba. E retonan pa Aruba ta varios.
Esey ta encera haci mas promocion, pero fuera di esey e damanan mester di un bon luga den e federacion y pa desaroya esaki pa e damanan bin hunto y pa tin un bon ambiente caminda cu nan por hunga futbol. Tambe mester por gusta e deporte pa nan por participa den e competencia.
Michael van de Star, encarga cu relacionnan internacional di KNVB, a comenta cu motibo di su bishita ta cu tin un curso specialmente pa e coachnan femenino. E ta un extra curso pasobra ta trata di coachnan di Aruba, Boneiro y Corsou. Esaki ta e prome curso riba e format aki cu nan ta organisa. E ta contento cu por a organisa esaki hunto cu AVB. Ta un bunita grupo diverso di hende muhe cu tin hopi dinamismo. Fuera di esey ta draai hunto cu Brouwer pa asina yuda AVB pa loke ta futbol di damas.
Van den Star sa bin Aruba varios biaha y e tempo ey e categoria aki tabata den un fase inicial. Awo por mira cu ta hunga mas futbol y ta bezig cu e coachnan femenino. E grupo aki ta e trekkernan pa futuro den e diferente club y federacion. Ta bunita pa mira e desaroyo aki cu ta andando y ta purba hunto cu AVB duna un extra boost. Tanto e clubnan, hungado, coach y refereenan tin nan rol. Conhuntamente cu AVB por pone un paso firma pa un futuro firme pa futbol di damas.
