Fundacion Pariba Boxing a tene nan prome evento di manera exitoso

ORANJESTAD (AAN): Fundacion Pariba Boxing Club ta hopi contento cu e exitoso promé evento di boxeo, "Anochi di Pelea Explosivo",

cu a tuma luga dia 30 di September ultimo na YMCA San Nicolas.      E evento aki a tuma lugar  cu peleanan na nivel nacional e internacional.

            Pariba Boxing Club, un organisacion sin fin di ganashi dedica na empodera muchanan chikito, hubentud y adolescente pa medio di e deporte di boxeo na San Nicolas, ta comprometi pa haci un diferencia positivo den comunidad.

            E evento "Anochi di Pelea Explosivo" no tabata solamente un oportunidad pa disfruta di peleanan emocionante, pero tambe un manera pa inverti den e futuro di comunidad.

            E evento a conta cu participacion di un boxdo internacional destaca di nos isla ruman, Corsou, cual a agrega un atraccion special na e evento. For di 8 p. m. te 10 p. m., e asistente por a presencia un espectaculo di boxeo emocionante cu a mantene publico hopi entreteni.

            Fondonan cu a sera durante e evento lo wordo destina directamente na e proyecto comunidad di Pariba Boxing Club. "Nos meta no ta solamente pa celebra e deporte di boxeo, pero tambe pa canalisa e pasion y disciplina pa empodera nos hubentud di manera positivo", segun Macro Dupersoy, fundador di Pariba Boxing Club.

            Fundacion Pariba Boxing Club ta gradici comunidad pa nan sosten y presencia na "Anochi di Pelea Explosivo". Nan ta entusiasma pa e exito di e prome evento aki y ta spera di continua inspira y empodera hubentud pa medio di boxeo den futuro.