Fin di siman aki tin Dutch Caribbean 9-Ball na Aruba

ORANJESTAD (AAN): E establecimento di TT Billiards ta preparando pa organiza e torneo di mas grandi den Caribe Hulandes.

   E fin di siman benidero Aruba ta anfitrion di ‘Dutch Caribbean 9-Ball 2022’ den TT Billiards & Sport Lounge na Tanki Leendert. Un torneo cu e maximo (full field) di 64 hungador di Aruba, Bonaire y Curaçao.

   DIARIO a compronde cu despues di basta aña cu Aruba lo ta sede di un evento asina grandi di billiard y e biaha aki dedica na e legendario biljarista Orlando "Indio" Kelkboom. Ken no conoce Indio, un gran competidor, curason grandi y vencedor.

   E fanaticada di billiard y deporte engeneral ta keda invita diabierna awor pa 6’or. Lo tin tiramento di lot, ceremonia di apertura y di biaha accion den gran forma.

   For di Bonaire ta yegando un delegashon di bon caliber. Curaçao ta mandando un batayon di cañon pa marca historia. E bandera  di Aruba mes lo ta masha bon defende pa nos toppersnan manera entre otro Jorzihno Everon, Jason Kock, Roukos Tanoury, Gunnar Leonardo, Angelo Tromp.

   Despues di basta aña, esnan cu a pone Aruba su nomber resona den Caribe y Sur America, lo tey back. Ditto Acosta, Aaron Franken, Ryan Rampersaud, Richard Wolff, Jorge Petrocci ta entre e 42 hungadornan local cu lo duna lo maximo pa e titulo keda Aruba.

   E torneo lo continua diasabra y diadomingo pa 11’or di mainta. Logicamente cu un evento di e magnitud aki no ta posibel sin ayudo di sponsors cu ta tene e deporte na bida.

   TT Sport Lounge ta situa riba Wendy's Tanki Leendert, entrada ta completamente gratis.