Exitoso prome anochi di Funstacle Diamars cu a pasa

ORANJESTAD (AAN) — Manera ta conoci, diamars cu a pasa, tabata tin e prome anochi di Funstacle, cu a tuma lugar den e local market banda di Bochincha.

Den un entrevista cortico cu DIARIO, Joseandro Chikito, ken a comenta cu pa prome biaha nan ta organiza “circuit sprint”. E tabata un anochi unda participantenan individual a pasa riba diferente obstaculo, y tin teamnan cu a inscribi pa haci “team building” y tambe midi forza contra otro.

Pa e participantenan cu a logra e retonan mas lihe tabata tin un pakete door di sponsornan, pa nan disfrut e.  Joseandro kier a recorda esnan interesa cu ainda tin chens pa incribi pa e di dos dia di e evento, cu lo ta Diadomingo 1 di Mey proximo. E evento aki ta pa un bon causa. Locual nan ta recauda ta pa duna bek na comunidad, y e biaha aki ta pa Fundacion Jordan Ling. El a bisa cu e fundacion aki ta hopi interesante y e ta enfoca riba salud mental.

Chiquito a agrega cu nan ta ansioso pa e evento di Diadomingo y cu nan lo ta bek aki dos aña. Diamars 26 e acogida tabata hopi bon, el a bisa cu hopi satisfaccion.