Exitoso Aruba Open 2023 presenta pa Tiger Taekwondo Academy

ORANJESTAD (AAN): E siman cu a pasa,  Tiger Taekwondo Academy a tene e di 23 edicion di e torneo internacional Open Aruba Taekwondo 2023.

   Atletanan for di 8 pais tabata di bishita aki y a competi contra otro den batayanan di kita sombre. E atletanan tabata procedente di Aruba, Curaçao, Puerto Rico, Colombia, Cuba, Ecuador, Brazil y Republica Dominicana.

   Aruba Open 2023 a tuma lugar di 21- pa 26 di Augustus y e final den Centro Betico Croes a conta cu mas di 88 atleta nacional y internacional.  Tanto e coachnan di Tiger Taekwondo Academy cu ta master Teo Rodriguez, Jason Ridderstaat, tur miembro di stichting, ta gradici tur esnan cu a haci e evento deportivo aki posibel.

   Despues cu himno di Aruba a resona, pastor Tirzo Kolfin a brinda e oracion di bendicion y e maestro di ceremonia, Addonsito Croes a yama algun persona den e mundo deportivo cu a duna discurso. Nan tabata Moises Fernandez di Aruba Taekwondo Bond, Nicole Hoeverts di Comite Olimpico Aruba y minister di deporte Endy Croes. Master Teo Rodriguez a gradici un y tur,  inclui e refree- y boluntarionan y na final a haci entrega di e premionan corespondiente na tur ganado. Algo sigur ta cu otro aña 2024, e torneo aki lo t’ey sigur atrobe.