Evento historico di deporte pa Comite Olimpico Arubano y e isla ta tuma lugar e siman aki

Organizacion Continental Panam Sports lo reuni na Aruba

ORANJESTAD (AAN): Pa prome biaha den historia di Comite Olimpico Arubano (COA) y Aruba, e organizacion Olimpico di nos continente “Panam Sports” lo organiza un reunion aki riba e isla durante e siman aki.  E lo ta algo historico, pasobra prome biaha esaki ta socede.  Lo bay tin 2 dia di reunion grandi, tanto Diamars 26 y Diaranson 27 di Mei 2026.

   Panam Sports ta conta cu 41 pais miembro di e continente Panamericano y tin diferente tarea manera maneho di deporte Olimpico y ta organiza e Weganan Panamericano Junior y Wegananan Panamericano. COA ta miembro di e organizacion aki y ta conta cu un miembro dentro di e Comite Ehecutivo den cargo di Señora Nicole Hoevertsz cu ta Secretaria General di COA.

   E reunion aki lo trece tur miembro di e Comite Ehecutivo di Panam Sports na Aruba, unda lo tin 2 dia di reunion, ademas di diferente bishita cerca stakeholders importante di deporte.

   Comite Olimpico Arubano ta contento di por ta anfitrion di un reunion di e nivel aki na Aruba, unda cu Aruba ta logra mustra e capacidad cu tin pa por organiza eventonan di e nivel aki, atraendo organizacion grandi den mundo di deporte pa mira Aruba como un “hub” den nos region.

   Banda di esaki, e colaboracion aki por trece hopi beneficio pa tur federacion miembro di COA y e deporte en general na Aruba.

   Nicole Hoevertsz a indica cu e reunion di Panam Sports ta grandi, pasobra e ta duna Aruba y COA e chens di ricibi e coleganan intercontinental porfin den nos cas.  Pasobra hopi tempo, semper delegacion di Aruba ta wordo ricibi cu tur amabilidad y cariño na diferente pais, y awor porfin por debolbe e hospitalidad ey na e coleganan.

   E reunionnan lo bay ta den Ballroom di Aruba Marriott Resort & Stellaris Casino, cu lo ta bon prepara pa ricibi e reunionnan aki y tur ehecutivo di asociacionnan continental lo tey presente na e reunionnan na Aruba.

   Hoevertsz a indica cu nan lo bay ta dos dia di reunion, y nan lo tin chens tambe di duna nan algo social, incluyendo un bunita cena riba beach, unda lo bay tin un Show di Carnaval pa demostra na e comisionnan aki con na Aruba ta disfruta y con ambiente ta riba e isla.

   E motibo pakico e reunionnan aki ta importante pa Aruba, ta cu como cu paisnan grandi por organiza competencianan na nivel gigantesco, esey ta un reto demasiado grandi pa e isla debi na su tamaño, pero loke si por wordo haci, ta organiza evento-, reunion-, asamblea-, curso-, clinics, etc., y esey ta intencion di COA pa algun aña caba.

   Hunto cu Aruba Tourism Authority, kier demostra e aspectonan bunita cu Aruba tin, y esey lo beneficia e Federacionnan local tambe, como cu nan lo por siña mas con pa organiza evento, of reunion, y di esey esun cu finalmente ta beneficia ta pais Aruba, deporte di Aruba, y deportistanan. Pesey mes ta asina contento di por ricibi Comite Ehecutivo di Panam Sports na Aruba.