Esaki ta e ganadornan copa Hubenil Gobernador Felipe B. Tromp 2024

Nombernan a worde divulga

ORANJESTAD (AAN): E comision organizado cu asistencia di Asociacion Trabao pa Hubentud e aña aki a ricibi no menos cu nobenta nominacion parti den diferente sector esta cultura, deporte y sector social. Sin duda un record y un interes grandi bou di nos hendenan pa reconoce  e dedicacion di nos hobennan cu ayudo di mayornan, team, scol, etc.

   Pa e aña aki e comision a trece un cambio, esta cu a introduci un copa pre hubenil pa esnan entre 8 y 12 aña y copa hubenil pa esnan entre 13 pa 21 aña.

   Den categoria di Pre Hubenil e premio ta bay pa Ethan Geerman un hoben di ocho aña di edad. Ethan tin e malesa cronico epidermolysis bullosa. Esaki ta un malesa cu ta haci bo cuero fragil y por haya herida hopi facil. Mester cuido constante di e heridanan. Ethan ta bay scol normal y ta haci deporte. En principio e no mag hunga futbol pa motibo cu e por haya lesion e afecta su cuero.

   Pero toch Ethan ta hunga futbol cu su team di Estrella U9/2 y e ta forma parti di e team di Aruba Soccer Academy. Na december 2023 el a forma parti di seleccion cu a bay hung aña Colombia. E sa di destaca durante cada wega di futbol. E ta un inspirashon pa hopi hende, e tin un sentido di perseverancia hopi halto y ta purba sobrepasa tur limitashon. E ta consciente di consecuencianan di su enfermedad despues di cada partido, esta cu e tin cu haya tratamento pa su dolornan y heridanan. E ta determina pa no laga esaki strob’e. Na scol e ta inclui su mes den tur grupo y no tin miedo pa papia tocante su condicion cu el a nace cune. E ta para pa respeta y acepta otro sin importa color, rasa of condicion di malesa. E ta chikito pero cu un curason grandi. E ta influencia y inspira otronan den un forma positivo. Su famia ta sostene e lucha pa inclusion, diversidad y igualdad pa tur mucha cu tin cualkier malesa cu  por haci nan cay pafo di normanan existente.

   Den categoria hubenil e premio ta bay pa e hoben landado Braynsly Dirksz. Braynsly tin 17 aña di edad y desde su nuebe aña e ta practica e deporte di landamento. El a yega di

representa Aruba den diferente competencia internacional y a sa di gana hopi medaya. Recientemente el a keda nombra como atleta ganado masculino den e categoria di 14 pa 17 aña pa e Premio Excelencia den Deporte.

   Su ultimo logro tabata ora el a gana tres medaya di oro durante e competencia di Carifta Aquatics na Bahamas.

Fuera di ta practica su deporte faborito constantemente, e mes ta duna les di landamento y sa haci presentacion na scol pa conta tocante su motivacion y dedicacion na e deporte. E ta miembro active di Aruba Dolphins.

   Ambos ganado, esta Ethan Geerman y Braynsly Dirksz lo ricibi nan premio dia 27 di april, Dia di Rey, durante un ceremonia special den Wilhelmina Park for di man di Gobernador di Aruba.