Equiponan ta biento en popa pa pa XXI Torneo Internacional di Bolas Criollas

ORANJESTAD (AAN): Despues di 2 aña di pandemia causa pa covid-19, Papaya Ranch Bolas Criollas Team

a tene un exitoso Torneo Nacional riba 18 maart ultimo y awo tin e grato placer pa anuncia XXI Torneo Internacional di bolas criollas na Aruba.

   DIARIO a haya sa, cu e torneo lo tuma lugar riba dianan 1, 2, 3 y 4 di september venidero riba canchanan di Papaya Ranch. E torneo ta conta cu participacion di 18 ekipo for di Bonaire, 20 ekipo for di Curaçao y 29 ekipo local den categoria di damas y caballeros.

   Actualmente ekiponan di Aruba ta den pleno entrenamento tur diamars y diahuebs riba canchanan di Papaya Ranch.

   Diahuebs 1 september 2022 lo cuminsa cu algun weganan local y diabierna 2 september 2022 pa 7:00pm lo tene apertura official cu sake di prome bola y despues lo sigui cu entretenimento musical di X-Static.

   Diasabra 3 september 2022 durante henter dia cuminsando pa 11or di mainta ekiponan lo bataya cu otro. Clasificacion y final lo sigui diadomingo y pa atardi lo conoce Campeon y Sub-campeon di cada categoria.

   Pa clausura di e torneo aki lo tin entretenimento musical di Rincon Boyz. Tur dia lo tin bar bon surti y cushina cu cuminda crioyo manera costumber.

Papaya Ranch ta invita un y tur pa asisti y apoya tur ekipo y deporte en general