Equipo di SV Stingers Softball a bautisa nan uniform nobo

ORANJESTAD (AAN): Diaranson anochi, den un esfera ameno na Centro di Bario Noord a tuma luga bautismo di uniform di SV Stingers SBT.

   E organizacion di SV Stingers SBT ta un ekipo di softball hoben y ta consisti di alrededor 20 hungado cu hopi pasion pa e deporte. Pa lunanan largo directiva a traha hopi duro pa por a lanta e ekipo di softball y awe ta un realidad.

   Minister Endy Croes acompaña pa su kerida esposa Dilaila Croes tabata presente durante e ceremonia di bautismo. Meymey di hungado y dirigentenan di e ekipo y famia a efectua bautismo di e uniform nobo.

   Minister Endy Croes hiba palabra di hopi motivacion compartiendo e 4D di Deseo, Disciplina, Dedicacion y Determinacion pa logra den deporte. Alavez Mandatarido di Deporte a felicita ekipo di SV Stingers SBT cu nan statuut y bautismo di uniform.

   Palabranan di gradicimento na tur cu a aporta y haci e bautismo di uniform nobo un realidad y alavez ta desea ekipo di SV Stingers SBT hopi exito den campeonato 2023.