Elliott Loonstra a trece medaya di oro pa Aruba

El a subi di posicion den su ranking y ta atrobe #7 mundialmente

ORANJESTAD (AAN):  Elliott Loonstra y su coach Luciano Mazzeo a sali di Aruba riba 1 di februari 2023 pa participa na tres competencia den exterior, dos na Istanbul Turkia y uno na Cairo Egipto.

            E dos competencianan na Istanbul tabata e ‘European’s President’s Cup’ y e ‘Turkish Para Taekwondo Open’.

            Durante e President’s Cup Loonstra a lucha contra di Alemania ganando 9-0 den su prome pelea. Su di dos pelea tabata contra di Mexico (actualmente No. 6 na mundo) den cual e tabata un pelea bastante pareu pero Mexico a logra di haci dos skop den e ultimo 20 seconde di e pelea y asina a posiciona Loonstra na e di 5o lugar en general.

            Durante e Turkish Para Taekwondo Open Loonstra a lucha contra di Turkia despues di a pasa pa  cuarto final. E pelea aki a cuminsa na fabor di Loonstra cu eventualmente a bay pa e ‘ronda di oro’ y e Turko a logra iguala e score poniendo Loonstra un bes mas na e di 5o lugar.

            Despues di e competencianan na Turkia Elliott Loonstra PLY y su coach Luciano Mazzeo a biaha pa Cairo pa competi na e prome Egypt Para Taekwondo Open. Den su prome pelea Loonstra a competi contra un atleta Egipto logrando un score di 34-4 contra di su oponente hibando Loonstra asina pa e final. Den e final Loonstra a lucha contra un otro atleta Egipto.

            Durante di e pelea final e stadion tabata resona cu gritonan di e fanaticada apoyando nan atleta Egipcio y e pelea a termina 12-2 na fabor di Loonstra. Esaki a haci cu Elliott Loonstra PLY a tuma e podium na e prome posiciona asina ganando e medaya di oro.

            Durante e ceremonia di entregamento di premio coach Luciano Mazzeo a wordo otorga un trofeo pa e di dos mihor coach masculino presente na e competencia cual ta demostra cu e tin conocimento destaca di e deporte y un gran capacidad pa training.

            Elliott Loonstra PLY ta extremadamente contento cu e resultadonan di e competencianan aki y cu e puntonan acumula el a subi di posicion den su ranking y ta atrobe #7 mundialmente.

            Elliott Loonstra PLY kier agradeci su famia pa e apoyo abrumador cu semper nan a dun’e durante di su carera, na Romina Martinez di RoroFitness cu ta yuda Loonstra cu su training fisico durante e ultimo dos añanan y BodyZone Aruba cu ta sponsor Loonstra cu e espacio pa train y asina mehora su habilidad den tanto para taekwondo como tambe den su desaroyo fisico en general. Un danki grandi na e pueblo di Aruba pa semper a duna apoyo na Loonstra y su coach Luciano Mazzeo.