Elisabeth Timmer a marca historia como landador di Stingray Swimming Team na Hulanda

Un biaha mas e ta logra

ORANJESTAD (AAN): Aruba su landado elite di Stingray Swimming Team, Elisabeth Timmer, a logra 3 marca historico pa Aruba durante e ‘Nederlandse Kampioenschappen kb 2025’, cu ta tuma lugar actualmente na Hulanda.

   Durante e campeonato aki, Timmer a logra algo extraordinario: estableciendo tres record Arubano nobo den piscina cortico, demostrando consistencia, forsa mental y un nivel tecnico excepcional.

   Te cu awor, Elisabeth a kibra 3 Record Arubano den tres evento diferente: (*) Den 50m Freestyle – 25.20.  (*) Den 100m Individual Medley – 1:02.89.  (*) Den 100m Freestyle – 54.60.

   E logro den e 50m freestyle ta particularmente special, mirando cu e tempo di 25.20 a supera e record anterior di Ally Ponson, cu tabata 25.24, mustrando cu cada centesima di seconde ta conta na nivel elite.

  Den e 100m IM, Timmer a demostra progreso constante y determinacion. Durante e mesun dia, el a mehora su propio record Arubano dos biaha: prome cu 1:03.20 y despues, anochi, cu un tempo impresionante di 1:02.89.

   Pa cera e dia na manera magistral, Elisabeth a kibra un di tres record Arubano den e 100m freestyle. Despues di logra e tempo di 55.12 anteriormente, el a baha e tempo anochi pa 54.60, confirmando su posicion como un di e landadornan mas fuerte y consistente di Aruba na e momento aki.

   Stingray Swimming Team ta sumamente orguyoso di Elisabeth Timmer. Su desempeño na Hulanda no solamente ta un triunfo personal, pero tambe un inspiracion pa e landadornan hoben Arubano cu ta aspira pa yega nivel internacional. E resultadonan aki ta un prueba cla di loke dedicacion, disciplina y confianza den e proceso por logra.

   Nan ta sigui cu hopi orguyo y entusiasmo tur e pasonan di Elisabeth den e campeonato aki. Aruba y Stingray Swimming Team ta bon representa.