Na estado di Georgia na Merca
ORANJESTAD (AAN): Despues cu na luna di Juli cu a pasa, a firma un MoU entre e ekipo di SV RCA (Aruba), Victory Boys (Curaçao) y SV Flamingo (Bonaire), awor e tres clubnan a anuncia e siguiente paso di e alianza ABC aki.
E meta y intencion di e tres clubnan ta pa crea un caminda di crecemento pa nan hungado- y coachnan. Cu un gran orguyo SV RCA, Victory Boys y SV Flamingo ta anuncia un paso concreto cu ta encera un colaboracion historico cu US Soccer Coaching Education di Georgia State.
Como parti di esaki ya caba e curso di “Grassroots”a tuma lugar y pronto e segundo parti di e colaboracion lo bira realidad, esta un curso pa cu Licencia D. Esaki lo bay tuma lugar aki na Aruba mes, di dia 23 pa 27 di september 2024.
Dos instructor di US Soccer Coaching Education lo biaha pa Aruba y lo lidera e curso aki. E curso aki ta disponibel exclusivamente pa entrenadornan di SV RCA, Victory Boys, y SV Flamingo. Un total di 26 Coach a registra y lo bay participa na e cursonan aki. Tur licencia di US Soccer ta reconoci pa Concacaf y ta marca un paso figo y significante pa desaroyo di e coachnan di futbol rib’e islanan ABC.
E curso, cu normalmente ta dura 6 luna, a ser adapta specialmente pa nos islanan ABC y asina lo duna e 26 coachnan cu a registra e oportunidad pa completa esaki den un periodo mas cortico. E “DLicense Course” na Aruba, lo marca e prome biaha den historia cu un licencia di US Soccer lo haci pafo di Merca.
E logro historico aki, lo tambe habri porta pa US Soccer den region Caribe. Aunke e curso pa e buelta aki ta exclusivamente p’e coachnan di RCA, Victory Boys y SV Flamingo, e tres club tin pa traha duro pa habri esaki pa tur club den futuro y asina aporta di nan banda na engrandece e futbol riba nan tres islanan.
Door di e colaboracion cu US Soccer Education, e clubnan aliado tambe a logra obtene dos luga p’e islanan ABC pa aña den e curso di Licencia C cu ta hopi keri na Merca. E licencia C tin solamente 100 luga disponibel na Merca. E oportunidad aki ta un paso importante pa esnan cu tin ambicion pa bira coach profesional y ta duna nan un caminda unda por sigui desaroya nan habilidadnan.
Aparte di e cursonan pa coach e clubnan RCA, Victory Boys y SV Flamingo, lo bay organiza un “College Clinic” na cuminsamento di 2025 rib’e islanan. Mas informacion tocante esaki lo sigui pronto.
Jeff Lopez, Presidente di RCA, a expresa su orguyo pa cu e logro aki, y el a declara: “E colaboracion aki lo habri porta pa hopi mas. Banda di fortalece nos infracstructura di nos coachnan, nos ta crea oportunidad nobo pa nos hubentud pa por logra nan soño y crea bon ser humano pa nos comunidad riba nos islanan.”
Hassnah Elhage, Presidente di SV Victory Boys, a agrega: “Nos ta orguyoso di por brinda nos coachnan un trayecto di coaching cu lo empodera nan y dunando nan hermentnan cu lo eleva futbol riba nos islanan, inspira e siguiente generacion di futbolista-y coachnan. Huntu nos lo sigui traha pa profesionalisa futbol.”
Evelina Cecilia-de Jongh, miembro di directiva di SV Atletiko Flamingo, ta remarca, “Esaki ta un paso monumental pa desaroyo di futbol n’e islanan ABC, y nos ta spera di mira su impacto a largo plazo.”
